పోలీస్ క్రీడల్లో మల్కాజిగిరి భేష్..!

On 27 Feb 2026 18:38:26

రాష్ట్రస్థాయి పోటీల్లో 81 పతకాలతో అదరహో!
 మెడల్ టేబుల్‌లో రెండో స్థానం కైవసం
 విజేతలను అభినందించిన సీపీ

మల్కాజిగిరి:
తెలంగాణ పోలీస్ క్రీడల్లో మల్కాజిగిరి కమిషనరేట్ సిబ్బంది పతకాల పంట పండించారు. సైబరాబాద్ వేదికగా ఫిబ్రవరి 16 నుంచి 21 వరకు జరిగిన '4వ తెలంగాణ రాష్ట్ర స్థాయి పోలీస్ క్రీడల' పోటీల్లో తమదైన ముద్ర వేశారు. క్రీడాకారులు అసాధారణ ప్రతిభ కనబరిచి ఏకంగా 81 పతకాలను ఖాతాలో వేసుకున్నారు. దీంతో ఓవరాల్ మెడల్ టేబుల్‌లో మల్కాజిగిరి కమిషనరేట్ రాష్ట్రంలోనే రెండో స్థానంలో నిలిచి సత్తా చాటింది.

వ్యక్తిగత విభాగాల్లో జోరు:
వివిధ క్రీడాంశాల్లో మల్కాజిగిరి క్రీడాకారులు తిరుగులేని ప్రదర్శన ఇచ్చారు.

ఏఆర్పీసీ సంజీవ్: వివిధ క్రీడల్లో ఏకంగా 8 పతకాలు సాధించి అందరి దృష్టిని ఆకర్షించారు.

ఏఆర్పీసీ యమన్: విలువిద్య (ఆర్చరీ)లో గురి తప్పకుండా నాలుగు స్వర్ణ పతకాలు కొల్లగొట్టారు.
డబ్ల్యూపీసీ నందిని: జిమ్నాస్టిక్స్‌లో మెరుపులు మెరిపించి 5 పతకాలు సాధించారు.

జట్టు విభాగాల్లోనూ అగ్రగామి:

మహిళల టగ్ ఆఫ్ వార్ జట్టు బంగారు పతకాన్ని సాధించగా.. పురుషుల ఫుట్‌బాల్, మహిళల కబడ్డీ జట్లు రజత పతకాలు (వెండి), పురుషుల కబడ్డీ జట్టు కాంస్య పతకాన్ని సాధించాయి. మహిళల విభాగంలో ఓవరాల్‌గా 'ఆల్ రౌండర్ రన్నరప్' ట్రోఫీని మల్కాజిగిరి దక్కించుకోవడం విశేషం.

విజేతలకు పురస్కారాలు:
అద్భుత ప్రతిభ కనబరిచిన క్రీడాకారులను మల్కాజిగిరి పోలీస్ కమిషనర్ ప్రత్యేకంగా అభినందించారు. ఈ సందర్భంగా వారికి ప్రశంసా పత్రాలతో పాటు నగదు బహుమతులను అందజేశారు.

సిబ్బందిలో క్రమశిక్షణ, శారీరక దృఢత్వాన్ని పెంపొందించడానికి క్రీడలు ఎంతగానో దోహదపడతాయని సీపీ పేర్కొన్నారు. క్రీడాకారుల విజయం కమిషనరేట్‌కు గర్వకారణమని కొనియాడారు.