(స్పెషల్ కరస్పాండెంట్, హైదరాబాద్ ) 
రేవంత్ రెడ్డి సమకాలీన రాజకీయాల్లో ఒక సంచలనం అని చెప్పవచ్చు.. ప్రపంచంలోనే ఒక ప్రత్యేక చరిత్ర కలిగిన తెలంగాణ రాష్ట్రానికి రెండవ ముఖ్యమంత్రిగా పదవీ బాధ్యతలు చేపట్టి చరిత్ర సృష్టించిన యువ రాజకీయవేత్త.. అడ్రస్ లేకుండా పోయిన కాంగ్రెస్ పార్టీని జవసత్వాలు తీసుకుని వచ్చి తెలంగాణ రాష్ట్రంలో అధికారంలోకి తీసుకుని వచ్చిన రాజకీయ వేత్తగా రేవంత్ రెడ్డి ఒక నూతన అధ్యాయానికి శ్రీకారం చుట్టాడు.. పదేళ్ల టిఆర్ఎస్ పార్టీని మట్టి కరిపించి ఒంటి చేత్తో కాంగ్రెస్ పార్టీని అధికారంలోకి తీసుకొని వచ్చాడు.. రేవంత్ రెడ్డి ముఖ్యమంత్రి కాగానే అనూహ్యంగా ఎన్నెన్నో నిర్ణయాలు తీసుకోవటం జరిగింది.. కాంగ్రెస్ పార్టీ అధినాయకత్వం సూచించినట్లుగా పార్టీ అధికారంలోకి వస్తే ఆరు గ్యారెంటీలను అమలు చేస్తానని మాట ఇచ్చిన రేవంత్ రెడ్డి ఆ మాట తప్పకుండా వరుసగా అన్ని పథకాలకు రూపకల్పన చేయడం కూడా జరిగింది.. దాంతో తెలంగాణ ప్రజలందరికీ రేవంత్ రెడ్డి ఒక ఆశాజ్యోతి లా కనిపించాడు.. ఇంతవరకు బాగానే ఉంది.. కొద్ది రోజులు గడిచే కొద్దీ రేవంత్ రెడ్డి డొల్లతనం బయటపడసాగింది.. చేసిన వాగ్దానాలను నిలబెట్టుకోవడంలో రేవంత్ రెడ్డి క్రమేపి వెనుకంజ వేశాడన్నది విశ్లేషకుల వాదన.. మరీ ముఖ్యంగా గత బిఆర్ఎస్ ప్రభుత్వం చేసిన తప్పిదాలను రేవంత్ రెడ్డి కూడా చేస్తున్నాడనే విమర్శలు వెల్లువెత్తాయి... ఆ విమర్శలకు అనుగుణంగానే పరిస్థితులు కూడా గోచరించడం కనిపిస్తోంది.. ముఖ్యంగా పరిపాలనలో కుటుంబ సభ్యులు జోక్యం చేసుకోవడం, తన ప్రభుత్వ సహచరుల్లో ఎవరిని నమ్మకపోవడం.. కేవలం కమిషన్ల కోసమే కొన్ని పథకాలు రూపకల్పన చేయడం.. పార్టీలో అంతర్గత కుమ్ములాటలు.. ప్రజా అవసరాలకు అనుగుణంగా కాకుండా పార్టీ పెద్దలు చెప్పినట్లుగా రేవంత్ రెడ్డి నడుచుకోవడం.. ఇలా ఎన్నెన్నో కారణాలు రేవంత్ రెడ్డి ప్రభుత్వం పై తీవ్రమైన ప్రభావాన్ని చూపుతున్నాయి అన్నది అక్షర సత్యం.. పరిపాలనలో ఎంతో మార్పును తీసుకుని వస్తాడు అని భావించిన తెలంగాణ ప్రజలకు రేవంత్ రెడ్డి కూడా ఒక సామాన్యమైన రాజకీయ వేత్తగా కనిపించడంతో యావత్ ప్రజానీకం ఎంతో నిరాశకు గురయ్యారు.. సామాన్య ప్రజల ఆశలన్నీ గాల్లో కలిసిపోయాయి..

సజావుగా సాగుతున్న రేవంత్ రెడ్డి పరిపాలనలో ముఖ్యమైన శాఖల్లో అవినీతి భారీగా పేరుకుని పోవడం ఇప్పుడు రాజకీయ వర్గాల్లోనూ ప్రజల్లోనూ తీవ్రమైన చర్చకు దారి తీసింది.. అవినీతి రహిత ప్రజా పాలన అందిస్తానని వాగ్దానం చేసిన రేవంత్ రెడ్డి ప్రభుత్వంలో కూడా మునుపటి ప్రభుత్వంలో జరిగిన అవినీతి కార్యకలాపాలు యధావిధిగా కొనసాగుతుండడం ఆందోళన కలిగిస్తోందని విశ్లేషకులు భావిస్తున్నారు.. అయితే ఏ శాఖలో అవినీతి భారీగా జరిగే అవకాశం ఉందో ఆయా శాఖలు ముఖ్యమంత్రి రేవంత్ రెడ్డి తన వద్ద ఉంచుకోవడం ఏమిటి అని రాజకీయ విశ్లేషకులు ప్రశ్నిస్తూ ఉన్నారు.. ఆయా శాఖలను నిర్వహించే సామర్థ్యం ఇతరులకు లేవా..? లేక ఆయా శాఖలు కేటాయించిన వారు అవినీతికి పాల్పడుతారని జాగ్రత్త పడుతున్నారా..? అలాకాకుండా ఆయా శాఖల్లో తాను మాత్రమే అవినీతికి పాల్పడి భారీగా అక్రమార్చన చేయవచ్చు అనే భావనతో రేవంత్ రెడ్డి ఉన్నాడా..? అన్న అనుమానాలను కూడా రాజకీయ విశ్లేషకులు బహిర్గతం చేస్తున్నారు.. ఏది ఏమైనా ముఖ్యమైన శాఖలన్నీ తన వద్ద ఉంచుకోవడంతో రేవంత్ రెడ్డి రాజకీయ భవితవ్యం పై తీవ్రమైన ప్రభావం చూపుతోందని విశ్లేషకులు సూచిస్తూ ఉన్నారు..

పరిపాలన సౌలభ్యం కోసం శాఖలన్నింటిని ఇతరులకు కేటాయించడం ఆ శాఖలను సమన్వయం చేసుకోవడం, చూసుకోవడం ముఖ్యమంత్రి విధిగా భావిస్తారు.. కానీ ఇప్పటి కాంగ్రెస్ ప్రభుత్వంలో అది జరగటం లేదన్నది వాస్తవం.. గడచిన టిఆర్ఎస్ ప్రభుత్వంలో కూడా ఇదే సమస్య తీవ్రంగా ఉండేది.. ఆ ప్రభుత్వంలో పేరుకు మాత్రమే మంత్రులు వారికి శాఖలు కేటాయించబడి ఉండేవి.. కానీ పెత్తనం అంత అప్పటి ముఖ్యమంత్రి కేసీఆర్ ఆయన తనయుడు కేటీఆర్, అంతో ఇంతో హరీష్ రావు వీళ్లు మాత్రమే ఆధిపత్యం చెరయించేవాళ్లు.. అప్పట్లో కుటుంబ పాలన అంటూ ఎన్నెన్నో విమర్శలు తలెత్తాయి.. మరి ఇప్పుడేం జరుగుతోంది..? అప్పటి బీఆర్ఎస్ ప్రభుత్వంలో జరిగినట్టుగానే ఇప్పుడు కూడా పరిపాలన కొనసాగుతోంది అన్నది విమర్శకుల ప్రశ్న.. అయితే దీనంతటికీ కారణం ఏమిటి..? రేవంత్ రెడ్డికి అనుభవం లేకపోవడమా..? విషయాలపై పట్టు లేకపోవడంమా..? అందరినీ గుడ్డిగా నమ్మడమా..? లేకపోతే ఎవరిమీద నమ్మకం లేకపోవడమా..? ఏది ఏమైనా రాష్ట్రంలో జరుగుతున్న విషయాలన్నీ రేవంత్ రెడ్డికి తెలియకుండా జరుగుతున్నాయా..? తెలిసి జరుగుతున్నాయా అన్నది ఇక్కడ అర్థం కాని ప్రశ్నగా మిగిలిపోయింది.. ఎందుకంటే మరీ ముఖ్యంగా రేవంత్ రెడ్డి తన దగ్గర ఉంచుకున్న ముఖ్యమైన శాఖలలోనే విపరీతమైన అవినీతి జరుగుతోంది... మరి ఇది రేవంత్ రెడ్డి దృష్టికి రాలేదా.. అధికారులు ఆయన దృష్టికి రానివ్వడం లేదా..? ఒకవేళ తెలిసినా తెలియనట్లు నిమ్మకుండి పోతున్నారా..? అనూహ్యంగా వచ్చిన అద్భుతమైన అవకాశాన్ని రేవంత్ రెడ్డి సద్వినియోగం చేసుకోలేకపోతున్నాడా..? ఎందుకని ఆయన ఫెయిల్యూర్ ముఖ్యమంత్రిగా పిలిపించుకుంటున్నారు..? అన్నది కూడా అర్థం కాకుండా ఉంది.. వీటన్నిటి వెనుక జరుగుతున్న పరిణామాలు ఏమిటి..? ప్రస్తుతం రేవంత్ రెడ్డి చేయవలసినది ఏమిటి..? ఇటీవల హైదరాబాద్ నగరంలో జూబ్లీహిల్స్ ఉప ఎన్నికల్లో కాంగ్రెస్ అభ్యర్థి ఘన విజయం సాధించడంతో రేవంత్ రెడ్డి పరిపాలనపై ప్రజలకు ఇంకా నమ్మకముంది అన్నది స్పష్టంగా తెలుస్తోంది.. ఇలాంటి పరిస్థితుల్లో రేవంత్ రెడ్డి ప్రభుత్వం అవినీతి అనే కూపంలో కూరుకుని పోవడం పార్టీకి వ్యక్తిగతంగా రేవంత్ రెడ్డికి ఎన్నో ఆశలు పెట్టుకున్న తెలంగాణ ప్రజలకు కూడా ఎంతో నష్టాన్ని కలిగిస్తుంది.. ఒకవేళ రేవంత్ రెడ్డికి తెలియకుండా అవినీతి జరుగుతూ ఉన్నట్లయితే.. ఆయన ఇప్పటికైనా వాస్తవాలు తెలుసుకొని ముందుకు పోతే చరిత్రలో మిగిలిపోతాడు.. లేదంటే అందరిలాగే చరిత్ర హీనుడు అవుతాడని విశ్లేషకులు సూచిస్తూ ఉన్నారు.. హైడ్రా లాంటి ఉద్కృష్టమైన సంస్థలను ఏర్పాటు చేసి అవినీతిని ఉక్కు పాదంతో అణచివేయాలని రేవంత్ రెడ్డి ప్రయత్నించడం ఎంతో అద్భుతమైన విషయం.. కానీ హైడ్రా కూడా అవినీతిమయంలో చిక్కుకోవడం ఇప్పుడు వివాదాస్పదంగా మారింది.. ఇలాంటి మంచి మంచి నిర్ణయాలు తీసుకుంటున్న రేవంత్ రెడ్డి ప్రభకు ఎందుకు మసక అంటుతోంది..? దీనికి కారణం ఏమిటి..? అసలు రాష్ట్రంలో ఏమీ జరుగుతోంది..? అవినీతి మూలాలు ఎక్కడెక్కడ ఉన్నాయి..? టిఆర్ఎస్ ప్రభుత్వంలో వెలుగులోకి వచ్చిన అవినీతి నాయకులు అవినీతి అధికారులు అవినీతితో కూడిన పనులు రేవంత్ రెడ్డి ప్రభుత్వంలో కూడా కొనసాగుతుండడంలో ఆంతర్యం ఏమిటి..? 

ఈ విషయాలపై కూలంకుషంగా వాస్తవాలను ఆధారాలతో సహా క్రోడీకరించి వరుస కథల ద్వారా మీ ముందుకు తీసుకుని రానుంది" భారత శక్తి " దినపత్రిక ద్వారా " ఫోరం ఫర్ యాంటీ కరప్షన్ అండ్ హ్యూమన్ రైట్స్ సంస్థ "..