ప్రజావాణికి 48 దరఖాస్తులు

On 21 Apr 2026 12:47:53

సమస్యలను వెంటనే పరిష్కరించాలి: కలెక్టర్ నారాయణ రెడ్డి
వరి ధాన్యం కొనుగోలు కేంద్రాలను ప్రారంభించాలని ఆదేశం

రంగారెడ్డి:

జిల్లా కలెక్టరేట్‌లో సోమవారం నిర్వహించిన ప్రజావాణి కార్యక్రమానికి ప్రజల నుండి మంచి స్పందన లభించింది. జిల్లాలోని వివిధ ప్రాంతాల నుంచి వచ్చిన బాధితులు తమ సమస్యలను పరిష్కరించాలని కోరుతూ కలెక్టర్ సి.నారాయణ రెడ్డికి వినతి పత్రాలు సమర్పించారు. మొత్తం 48 ఫిర్యాదులు అందగా, అందులో రెవెన్యూ విభాగానికి చెందినవి 8, ఇతర శాఖలకు సంబంధించినవి 40 దరఖాస్తులు ఉన్నాయి.

పెండింగ్‌లో పెట్టొద్దు..
ప్రజావాణిలో అందిన అర్జీలను ఆయా శాఖల అధికారులు తక్షణమే పరిశీలించి పరిష్కరించాలని కలెక్టర్ ఆదేశించారు. సామాన్య ప్రజలు తమ సమస్యల పరిష్కారం కోసం ఆశతో ఇక్కడికి వస్తారని, వారి దరఖాస్తులను పెండింగ్‌లో ఉంచకుండా ఎప్పటికప్పుడు క్లియర్ చేయాలని స్పష్టం చేశారు. బాధితులకు న్యాయం జరిగేలా చూడాల్సిన బాధ్యత అధికారులపై ఉందన్నారు.

ధాన్యం సేకరణపై నజర్:
అనంతరం వరి ధాన్యం కొనుగోలు ప్రక్రియపై కలెక్టర్ అధికారులతో సమీక్షించారు. జిల్లాలో ఎక్కడా ఆలస్యం చేయకుండా ధాన్యం కొనుగోలు కేంద్రాలను వెంటనే ప్రారంభించాలని ఆదేశించారు. కొనుగోలు కేంద్రాల వద్ద రైతులకు ఎండ తగలకుండా నీడ, తాగునీరు వంటి కనీస సౌకర్యాలు కల్పించాలని సూచించారు. రైతులు పండించిన పంటను అమ్ముకోవడంలో ఎలాంటి ఇబ్బందులు కలగకుండా చూడాలన్నారు.
ఈ కార్యక్రమంలో అదనపు కలెక్టర్ చంద్రారెడ్డి (రెవెన్యూ), జిల్లా రెవెన్యూ అధికారి (DRO) సంగీత, వివిధ శాఖల జిల్లా అధికారులు, కలెక్టరేట్ సిబ్బంది పాల్గొన్నారు.