*న్యూఢిల్లీ:

పశ్చిమ ఆసియా (మిడిల్ ఈస్ట్) వ్యూహాత్మక యుద్ధంలో తీవ్ర పరిణామాలు చోటుచేసుకుంటున్నాయి. అమెరికా, ఇజ్రాయెల్ కూటమి ఇరాన్‌ను లక్ష్యంగా చేసుకుని దాడులు జరపడంతో, ఇరాన్ తన ప్రతీకారాన్ని గల్ఫ్ దేశాలపై చూపిస్తోంది. ఈ పరిణామాల వల్ల సంక్షోభంతో ఏమాత్రం ప్రత్యక్ష సంబంధం లేని ఐక్య అరబ్ ఎమిరేట్స్ (యూఏఈ), కువైట్, బహ్రెయిన్ వంటి దేశాలు తీవ్రంగా నష్టపోతున్నాయి. అమెరికా దళాలకు సైనిక పరంగా ఆశ్రయం కల్పించడమే ఇప్పుడు ఈ గల్ఫ్ దేశాలకు పెద్ద శాపంగా మారింది.

*చమురు కేంద్రాలపై విరుచుకుపడ్డ క్షిపణులు
ఇరాన్ జరిపిన భీకర దాడుల్లో గల్ఫ్ దేశాల ఆర్థిక మూలాలైన చమురు ఉత్పత్తి కేంద్రాలు, అంతర్జాతీయ విమానాశ్రయాలు భారీగా ధ్వంసమయ్యాయి. ప్రస్తుతం బహ్రెయిన్, కువైట్‌లను లక్ష్యంగా చేసుకుని ఇరాన్ విరుచుకుపడుతుండగా, అమెరికా సైతం దీటుగా స్పందిస్తూ ఇరాన్‌పై బాలిస్టిక్ క్షిపణులతో ఎదురుదాడులు చేస్తోంది. ఒకవైపు కాల్పుల విరమణ ఒప్పందం అమలులో ఉన్నప్పటికీ, ఇరుపక్షాల మధ్య దాడులు, ప్రతిదాడులు నిరంతరాయంగా కొనసాగుతుండటం అంతర్జాతీయంగా తీవ్ర ఆందోళన కలిగిస్తోంది.

ఈ నష్టాన్ని పూడ్చడానికి అమెరికా ఒక వినూత్న వ్యూహాన్ని అమలు చేయాలని భావిస్తోంది. గతంలో తాము సీజ్ చేసిన ఇరాన్ చమురు ట్యాంకర్లు, అంతర్జాతీయ బ్యాంకుల్లో స్తంభింపజేసిన ఇరాన్ ప్రభుత్వ నిధులు, ఇతర ఆస్తులను విక్రయించి, ఆ సొమ్మును గల్ఫ్ దేశాల పునర్నిర్మాణానికి సాయంగా అందించాలని అమెరికా యోచిస్తోంది. దీనిపై త్వరలోనే అధికారిక ప్రకటన వచ్చే అవకాశం ఉంది.