రాజకీయాల్లో తండ్రి.. చదువుల్లో తనయుడు!

లింగోజిగూడ కార్పొరేటర్ కుమారుడికి జేఈఈ మెయిన్స్‌లో 99.72 శాతం

On 18 Feb 2026 18:42:05

లింగోజిగూడ:

తండ్రి ప్రజాసేవలో నిమగ్నమై డివిజన్ అభివృద్ధికి నిరంతరం శ్రమిస్తుంటే.. ఆ కుమారుడు పుస్తకాలతో కుస్తీ పట్టి జాతీయ స్థాయిలో ప్రతిభ చాటాడు. రాజకీయాల్లో తండ్రి ‘టాప్’ అనిపించుకుంటే, చదువుల్లో కుమారుడు ‘మేటి’ అని నిరూపించుకున్నాడు.

లింగోజిగూడ కార్పొరేటర్ దర్పల్లి రాజశేఖర్ రెడ్డి కుమారుడు దర్పల్లి త్రిషంక్ ఇటీవల విడుదలైన జేఈఈ (JEE) మెయిన్స్ ఫలితాల్లో 99.72 పర్సంటైల్‌తో అద్భుత విజయాన్ని సాధించారు.
అభివృద్ధి శిల్పికి.. ఆదర్శ పుత్రుడు
డివిజన్ అభివృద్ధి శిల్పిగా పేరుగాంచిన రాజశేఖర్ రెడ్డి, నిత్యం ప్రజల మధ్య ఉంటూ సమస్యల పరిష్కారానికి కృషి చేస్తుంటారు. తండ్రి ప్రజాసేవను స్ఫూర్తిగా తీసుకున్న త్రిషంక్, చదువుపై ప్రత్యేక దృష్టి సారించి ఈ ఘనత సాధించారు. క్రమశిక్షణ, పట్టుదలే తన విజయానికి మూలమని ఆయన పేర్కొన్నారు.
తండ్రి రాజకీయ రంగంలో ఆదర్శంగా నిలిస్తే, కుమారుడు విద్యా రంగంలో రాష్ట్ర స్థాయిలో అగ్రస్థానంలో నిలవడం స్థానికంగా చర్చనీయాంశమైంది.

ప్రశంసల జల్లు
ఒకే కుటుంబం నుంచి అటు ప్రజాసేవలో, ఇటు విద్యా రంగంలో రాణించడం పట్ల డివిజన్ ప్రజలు, రాజకీయ నేతలు హర్షం వ్యక్తం చేస్తున్నారు. “రాజకీయాల్లో తండ్రి – చదువుల్లో కుమారుడు టాప్” అంటూ సోషల్ మీడియా వేదికగా

అభినందనలు వెల్లువెత్తుతున్నాయి. భవిష్యత్తులో త్రిషంక్ మరిన్ని ఉన్నత శిఖరాలను అధిరోహించాలని పలువురు ఆకాంక్షించారు.