లింగోజిగూడలో పోలీసుల 'గల్లీ గల్లీ' పట్రోలింగ్

On 30 Jan 2026 15:13:01

సరూర్ నగర్:

లింగోజిగూడ డివిజన్ పరిధిలోని పలు కాలనీల్లో పోలీసులు గురువారం భారీ పట్రోలింగ్ నిర్వహించారు. ఎల్బీనగర్ ఏసీపీ కృష్ణయ్య, సరూర్ నగర్ సీఐ సైదీ రెడ్డి ఆధ్వర్యంలో పోలీసు సిబ్బంది వీధి వీధినా తిరుగుతూ తనిఖీలు చేపట్టారు. సాయి నగర్, బృందావన్ కాలనీ, జనప్రియ అపార్ట్‌మెంట్స్, జానకి ఎన్‌క్లేవ్, కామేశ్వర్ కాలనీతో పాటు సరూర్ నగర్ పోస్ట్ ఆఫీస్ పరిసరాల్లో ఈ సోదాలు కొనసాగాయి.

అసాంఘిక కార్యకలాపాలపై నిఘా:
స్థానికంగా శాంతి భద్రతలను కాపాడటమే లక్ష్యంగా ఈ పట్రోలింగ్ చేపట్టినట్లు పోలీసులు తెలిపారు. అనుమానాస్పద వ్యక్తుల కదలికలపై నిఘా ఉంచడం, అసాంఘిక కార్యకలాపాలకు చెక్ పెట్టడమే ఈ కార్యక్రమం ప్రధాన ఉద్దేశమని వెల్లడించారు. కాలనీల్లో ఎవరైనా కొత్త వ్యక్తులు కనిపిస్తే లేదా అనుమానాస్పదంగా ప్రవర్తిస్తే వెంటనే డయల్ 100కు గానీ, స్థానిక పోలీస్ స్టేషన్‌కు గానీ సమాచారం అందించాలని సూచించారు.

ప్రజల హర్షం:
పోలీసులు నేరుగా కాలనీల్లోకి వచ్చి పట్రోలింగ్ నిర్వహించడంపై స్థానికులు సంతోషం వ్యక్తం చేస్తున్నారు. ఇలాంటి తనిఖీలు నిరంతరం కొనసాగితే నేరాలు తగ్గుముఖం పడతాయని అభిప్రాయపడ్డారు. ప్రజల భద్రత కోసం పోలీసులు తీసుకుంటున్న చర్యలకు తాము పూర్తి సహకారం అందిస్తామని ఈ సందర్భంగా కాలనీవాసులు పేర్కొన్నారు.