*చమురు మార్కెట్‌లో భారత్‌ విశ్వరూపం!

*రాబోయే దశాబ్దపు ప్రపంచ డిమాండ్‌లో సగభాగం మనదే.. రష్యా చమురు దిగ్గజం రోజ్‌నెఫ్ట్‌ అంచనా

On 08 Jun 2026 10:30:05

న్యూఢిల్లీ :

అంతర్జాతీయ ఇంధన మార్కెట్‌లో భారత్‌ సరికొత్త శకాన్ని లిఖించబోతోంది. రాబోయే పదేళ్ల కాలంలో ప్రపంచవ్యాప్తంగా పెరిగే ముడిచమురు డిమాండ్‌లో సింహభాగం భారత్‌ నుంచే ఉండబోతోందని అంతర్జాతీయ నిపుణులు స్పష్టం చేస్తున్నారు. గ్లోబల్ మార్కెట్‌లో రానున్న దశాబ్దంలో అదనంగా పెరిగే చమురు అవసరాలలో సగం వాటా ఒక్క భారతదేశానిదేనని రష్యాకు చెందిన ప్రముఖ చమురు సంస్థ 'రోజ్‌నెఫ్ట్‌' ముఖ్య కార్యనిర్వహణాధికారి (సీఈవో) ఇగోర్‌ సెచిన్‌ ప్రకటించారు. సెయింట్‌ పీటర్స్‌బర్గ్‌ అంతర్జాతీయ ఆర్థిక సదస్సులో శనివారం ఆయన మాట్లాడుతూ.. ప్రపంచ చమురు రంగంలో భారత్‌ అత్యంత కీలకమైన, ప్రత్యేకమైన స్థానాన్ని సొంతం చేసుకుందని విశ్లేషించారు.

*2035 నాటికి రోజుకు 80 లక్షల బ్యారెళ్లు!
అంతర్జాతీయ ఇంధన సంస్థ (ఐఈఏ) అంచనాల ప్రకారం.. భారత ఆర్థిక వ్యవస్థ శరవేగంగా దూసుకుపోతుండటంతో దేశీయంగా ఇంధన వినియోగం భారీగా పెరగనుంది.

భారత్‌లో వృద్ధి:2035 నాటికి దేశంలో చమురు వినియోగం '44 శాతం వృద్ధితో.. ప్రతిరోజూ సుమారు 80 లక్షల బ్యారెళ్లకు చేరుకోనుంది.

*ప్రపంచ సగటు: భారత్‌తో పోలిస్తే మిగిలిన ప్రపంచ దేశాలలో ఈ వృద్ధి కేవలం 5 శాతం లోపే' పరిమితం కానుంది.

*గ్లోబల్ ఎనర్జీ హబ్‌గా భారత్
ప్రపంచంలోని ఇతర పెద్ద దేశాల ఆర్థిక రంగాలు మందగమనంలో సాగుతుండగా, భారత్‌లో పారిశ్రామికీకరణ, రవాణా రంగాలు ఊపందుకోవడం వల్లే ఈ స్థాయి డిమాండ్ ఏర్పడుతోందని ఆర్థిక నిపుణులు చెబుతున్నారు. రాబోయే రోజుల్లో ప్రపంచ ఇంధన రంగాన్ని శాసించే శక్తిగా భారత్‌ అవతరించబోతోందనడానికి ఈ గణాంకాలే నిదర్శనం.