పటాన్‌చెరు:

పటాన్‌చెరు పట్టణం నడిబొడ్డున ఉన్న జిల్లా పరిషత్ ఉన్నత పాఠశాల స్థలాన్ని కబ్జా చేసేందుకు కుట్ర జరుగుతోందని మెదక్ ఎంపీ రఘునందన్‌రావు ఆరోపించారు. ఈ కుట్రలో భాగంగానే పాఠశాల భవనాన్ని రాత్రికి రాత్రి కూల్చివేశారని ఆయన మండిపడ్డారు. గురువారం పటాన్‌చెరు శ్రీనగర్ కాలనీలో కూల్చివేతకు గురైన పాఠశాల భవనాన్ని బీజేపీ నాయకులతో కలిసి ఆయన పరిశీలించారు.

అధికారుల ఉదాసీనతపై ధ్వజం
ఈ సందర్భంగా ఎంపీ మాట్లాడుతూ.. తాను స్వయంగా కలెక్టర్, డీసీపీలకు ఫోన్ చేసి ఫిర్యాదు చేసే వరకు కూల్చివేతలు ఆపకపోవడంపై తీవ్ర అసంతృప్తి వ్యక్తం చేశారు. జాతీయ రహదారి విస్తరణకు ఈ పాఠశాల భవనం ఎలాంటి అడ్డంకిగా లేకపోయినా, ఏ అధికారంతో కూల్చివేశారో సమాధానం చెప్పాలని డిమాండ్ చేశారు. పాఠశాల ప్రహరీ ముందున్న దుకాణాలను వదిలేసి, లోపల ఉన్న భవనాన్ని కూల్చడం వెనుక ఉన్న ఆంతర్యం ఏమిటని ప్రశ్నించారు. బాధ్యులపై తక్షణమే కఠిన చర్యలు తీసుకోవాలని కోరారు.

 * 1962 కంటే ముందు నుంచే ఇక్కడ పాఠశాల ఉన్నట్లు ప్రభుత్వం నిధులు మంజూరు చేసిన ప్రొసీడింగ్స్, సర్వే రిపోర్టులను చూపారు.

 * కోర్టుల్లో ఓడిపోయిన వారు ఇప్పుడు అధికారుల అండతో కబ్జాకు యత్నిస్తున్నారని విమర్శించారు.

ఆందోళన చేస్తామని హెచ్చరిక

పాఠశాల స్థలాన్ని రక్షించాల్సిన జిల్లా యంత్రాంగం ఉదాసీనంగా వ్యవహరించడం శోచనీయమని ఎంపీ వ్యాఖ్యానించారు. కలెక్టర్ తక్షణమే స్పందించి విచారణకు ఆదేశించాలని, లేనిపక్షంలో స్థానికులతో కలిసి పెద్ద ఎత్తున ఆందోళన చేపడతామని హెచ్చరించారు.
ఈ కార్యక్రమంలో జిన్నారం మున్సిపల్ చైర్మన్ ప్రతాపరెడ్డి, మాజీ సర్పంచ్ నర్సింగరావు, బీజేపీ మండల అధ్యక్షులు ఈర్ల రాజు ముదిరాజ్, నాయకులు శ్రీనివాస్ గుప్తా, బైండ్ల కుమార్, శంషాబాద్ రాజు ముదిరాజ్, కొండా లక్ష్మణ్, సుజాత, బాల్రాజ్ తదితరులు పాల్గొన్నారు.