ప్రజావాణి దరఖాస్తులను సత్వరం పరిష్కరించాలి.

పెండింగ్‌లో ఉంచితే కఠిన చర్యలు: జీహెచ్‌ఎంసీ కమిషనర్‌ ఆర్.వి. కర్ణన్.

On 17 Feb 2026 11:37:40

ప్రజావాణి దరఖాస్తులను సత్వరం పరిష్కరించాలి.

హైదరాబాద్‌:
ప్రజల నుంచి అందే ఫిర్యాదులు, విన్నపాలపై అధికారులు ఉదాసీనంగా వ్యవహరించకూడదని, వాటిని నిర్దేశిత గడువులోగా సత్వరమే పరిష్కరించాలని జీహెచ్‌ఎంసీ కమిషనర్ ఆర్.వి. కర్ణన్ అధికారులను ఆదేశించారు.
సోమవారం జీహెచ్‌ఎంసీ ప్రధాన కార్యాలయంలో నిర్వహించిన 'ప్రజావాణి' కార్యక్రమంలో ఆయన పాల్గొని బాధితుల నుంచి నేరుగా వినతులను స్వీకరించారు.

28 ఫిర్యాదుల నమోదు ప్రధాన కార్యాలయంలో నిర్వహించిన ఈ కార్యక్రమానికి నగరంలోని వివిధ ప్రాంతాల నుంచి పౌరులు తరలివచ్చారు. మొత్తం 28 ఫిర్యాదులు అందగా, వాటిలో ఎక్కువగా పౌర సదుపాయాలు, టౌన్ ప్లానింగ్, పారిశుధ్యానికి సంబంధించినవి ఉన్నాయి.

కమిషనర్ ప్రతి దరఖాస్తును క్షుణ్ణంగా పరిశీలించి, సంబంధిత విభాగాల అధికారులతో అక్కడికక్కడే మాట్లాడారు. ఫిర్యాదుదారులకు సత్వర న్యాయం జరిగేలా చూడాలని ఆదేశాలు జారీ చేశారు.

విభాగాల వారీగా సమీక్ష :

ఈ సందర్భంగా కమిషనర్ మాట్లాడుతూ.. "ప్రజావాణికి వచ్చే ప్రతి ఫిర్యాదుకు అత్యంత ప్రాధాన్యం ఇవ్వాలి. ఆయా విభాగాల అధికారులు తమ వద్దకు చేరిన దరఖాస్తులపై తక్షణమే స్పందించి, క్షేత్రస్థాయిలో సమస్యను పరిష్కరించి నివేదిక సమర్పించాలి" అని స్పష్టం చేశారు. నిర్లక్ష్యం వహించే అధికారులపై చర్యలు తప్పవని హెచ్చరించారు.

ఈ కార్యక్రమంలో పాల్గొన్న అధికారులు అదనపు కమిషనర్లు సత్యనారాయణ, మంగతాయారుతో పాటు విజిలెన్స్ ఏఎస్పీ నరసింహ రెడ్డి, నిర్వహణ విభాగం చీఫ్ ఇంజనీర్ సహదేవ్ రత్నాకర్, సీసీపీ శ్రీనివాస్, జాయింట్ కమిషనర్లు జయంత్, రజనీకాంత్ తదితర విభాగాల ఉన్నతాధికారులు పాల్గొన్నారు.