సిగాచి యాజమాన్యం, అధికారులపై చర్యలు తీసుకోవాలి

కార్మిక శాఖ మంత్రికి మెట్టు శ్రీధర్ విజ్ఞప్తి

On 13 Apr 2026 18:04:28

సిగాచి యాజమాన్యం, అధికారులపై చర్యలు తీసుకోవాలి

పటాన్‌చెరు:

సిగాచి ఇండస్ట్రీస్ లిమిటెడ్ యాజమాన్యం, సంబంధిత అధికారుల నిర్లక్ష్యం కారణంగానే అమాయక కార్మికులు ప్రాణాలు కోల్పోతున్నారని నవభారత్ నిర్మాణ్ యువసేన వ్యవస్థాపక అధ్యక్షుడు, తెలంగాణ యువజన సంఘాల సమితి రాష్ట్ర ప్రధాన కార్యదర్శి మెట్టు శ్రీధర్ ఆరోపించారు. ఆదివారం ఆయన పటాన్‌చెరులో రాష్ట్ర కార్మిక శాఖ మంత్రి గడ్డం వివేక్‌ను కలిసి ఫిర్యాదు చేశారు. 2018 నుంచి 2024 వరకు జరిగిన తనిఖీ నివేదికల ఆధారంగా పరిశ్రమలో జరుగుతున్న నిబంధనల ఉల్లంఘనలను మంత్రి దృష్టికి తీసుకెళ్లారు.

*నివేదికలోని ప్రధాన అంశాలు:*

* *అదనపు నియామకాలు:* 2018-19లో 100 మంది కార్మికులకు మాత్రమే అనుమతి ఉన్నప్పటికీ, పరిమితికి మించి నియామకాలు చేపట్టారు.

* *యంత్రాల సామర్థ్యం:* 2022లో 818 HP లైసెన్స్ ఉండగా, అనుమతి లేకుండానే 1777 HP సామర్థ్యం గల యంత్రాలను ఏర్పాటు చేశారు.

* *భద్రతా లోపాలు:* 2019, 2021, 2023 తనిఖీల్లో యంత్రాలకు భద్రతా గార్డులు లేవని గుర్తించినా యాజమాన్యం పట్టించుకోలేదు.

నివేదికల గైర్హాజరు:*
ప్రమాదకర రసాయనాలు వాడే ఈ ఫ్యాక్టరీలో కనీసం 'హాజర్డ్ అనాలిసిస్' నివేదికలు కూడా లేవు.

ప్రతి ఏడాది తనిఖీల్లో లోపాలు బయటపడుతున్నా అధికారులు కఠిన చర్యలు తీసుకోకపోవడం వల్లే ఇటువంటి ప్రమాదాలు పునరావృతమవుతున్నాయని శ్రీధర్ ఆవేదన వ్యక్తం చేశారు. విధి నిర్వహణలో విఫలమైన అధికారులతో పాటు పరిశ్రమ యాజమాన్యంపై శాఖాపరమైన చర్యలు తీసుకోవాలని డిమాండ్ చేశారు. మృతి చెందిన కార్మికుల కుటుంబాలకు పూర్తిస్థాయిలో నష్టపరిహారం చెల్లించాలని, భవిష్యత్తులో ఇలాంటి ఘటనలు జరగకుండా కఠిన నిబంధనలు అమలు చేయాలని కోరారు.