పట్టుదలతో చదివి లక్ష్యాన్ని సాధించాలి-గణతంత్ర వేడుకల్లో మాజీ ఎంపీ మధుయాష్కి గౌడ్

సెల్‌ఫోన్లకు దూరంగా ఉంటేనే మంచి ర్యాంకులు

On 27 Jan 2026 16:43:57

పట్టుదలతో చదివి లక్ష్యాన్ని సాధించాలి-గణతంత్ర వేడుకల్లో మాజీ ఎంపీ మధుయాష్కి గౌడ్

చైతన్యపురి:

విద్యార్థులు తమ లక్ష్య సాధనలో ఎదురయ్యే ఆటంకాలకు నిరుత్సాహం చెందకుండా, పట్టుదలతో చదివి ఉన్నత శిఖరాలకు చేరుకోవాలని టీపీసీసీ ప్రచార కమిటీ చైర్మన్, మాజీ ఎంపీ మధుయాష్కి గౌడ్ పిలుపునిచ్చారు. చైతన్యపురిలోని అపోలో అకాడమీలో నిర్వహించిన 77వ గణతంత్ర దినోత్సవ వేడుకలకు ఆయన ముఖ్య అతిథిగా హాజరై జాతీయ జెండాను ఆవిష్కరించారు.

ఆత్మన్యూనత వీడాలి:
ఈ సందర్భంగా విద్యార్థులను ఉద్దేశించి ఆయన మాట్లాడుతూ.. ప్రతిభ ఉన్న వారికి ప్రస్తుత కాలంలో అపారమైన ఉద్యోగ అవకాశాలు ఉన్నాయని పేర్కొన్నారు. తాను కూడా వైద్యుడు కావాలని ఆశించి, చివరికి న్యాయవాద వృత్తిని ఎంచుకున్నానని తన అనుభవాన్ని పంచుకున్నారు. "తెలుగు మీడియం విద్యార్థులమని ఎవరూ ఆత్మన్యూనతకు గురికావద్దు. నేను కూడా తెలుగు మీడియంలోనే చదివి న్యాయవాదిగా ఎదిగాను" అని ఆయన ధైర్యాన్ని నింపారు.

రీల్స్‌కు దూరంగా ఉండండి:

నేటి తరం విద్యార్థులు సమయాన్ని వృథా చేయకుండా సెల్‌ఫోన్లు, సోషల్ మీడియా రీల్స్‌కు దూరంగా ఉంటేనే ఉత్తమ ర్యాంకులు సాధించగలరని సూచించారు. చదువుతో పాటు మానసిక ఉల్లాసం కోసం క్రీడలు, యోగా, జిమ్ వంటి వ్యాయామాల్లో పాల్గొనాలన్నారు. అకాడమీ యాజమాన్యం విద్యార్థులను ఆ దిశగా ప్రోత్సహించాలని కోరారు.

ఈ కార్యక్రమంలో పాల్గొన్న ప్రముఖులు చైతన్యపురి డివిజన్ అధ్యక్షుడు బండ సురేందర్ రెడ్డి, మాజీ అధ్యక్షుడు శశిధర్ రెడ్డి, నాయకులు శ్రీపాల్ రెడ్డి, వేణుగోపాల్ యాదవ్, చెన్నగోని రవీందర్, మార్కెట్ కమిటీ డైరెక్టర్లు పాశం అశోక్ గౌడ్, నేలపాటి రామారావు, బుడ్డ సత్యనారాయణ పాల్గొన్నారు. అలాగే అపోలో మెడికల్ అకాడమీ డైరెక్టర్లు శ్రీనివాస్ రెడ్డి, ప్రిన్సిపల్ మధుసూదన్ రెడ్డి, రమాకాంత్, రాహుల్ జైన్, నాగార్జున రెడ్డి, నవీన్ చారి, పాశం శ్రీకాంత్ తదితరులు పాల్గొన్నారు.