బడంగ్‌పేట్‌లో ‘స్పెషల్ సానిటేషన్’ డ్రైవ్.. నిబంధనలు ఉల్లంఘిస్తే జరిమానా తప్పదు!

On 31 Jan 2026 14:36:33

బడంగ్‌పేట్:

బడంగ్‌పేట్ మున్సిపల్ కార్పొరేషన్ పరిధిలో పారిశుద్ధ్య పనులు ముమ్మరంగా సాగుతున్నాయి. పట్టణాన్ని పరిశుభ్రంగా తీర్చిదిద్దే లక్ష్యంతో శుక్రవారం సర్కిల్-16 పరిధిలోని 60 డివిజన్లలో ‘స్పెషల్ సానిటేషన్ డ్రైవ్’ నిర్వహించారు. డిప్యూటీ కమిషనర్ పి. సరస్వతి పర్యవేక్షణలో ఈ ప్రత్యేక కార్యక్రమం చేపట్టారు.

పార్కుల్లో కంపచెట్ల తొలగింపు

ఉదయాన్నే క్షేత్రస్థాయిలోకి వెళ్లిన కమిషనర్ పారిశుద్ధ్య పనులను స్వయంగా పర్యవేక్షించారు. 60వ డివిజన్‌లోని మీర్‌పేట్ వెంకటసాయి ఎన్‌క్లేవ్ పార్కులో ఏపుగా పెరిగిన చెట్ల కొమ్మలను, కంపచెట్లను సిబ్బందితో కటింగ్ చేయించారు. పార్కులను ఎప్పటికప్పుడు శుభ్రంగా ఉంచాలని, ప్రజలకు ఆహ్లాదకరమైన వాతావరణం కల్పించాలని సిబ్బందిని ఆదేశించారు.

బాధ్యతారాహిత్యంపై కొరడా: రూ. 5 వేల జరిమానా

రోడ్లపై నిబంధనలకు విరుద్ధంగా వ్యర్థాలను పారవేసే వారిపై అధికారులు కఠినంగా వ్యవహరిస్తున్నారు. 62వ డివిజన్ బాలాపూర్ గణేష్ చౌక్ వద్ద ఒక వాహనంలో చెత్తను అడ్డగోలుగా తరలిస్తుండటాన్ని గమనించిన అధికారులు, వాహన యజమానికి అక్కడికక్కడే రూ. 5,000/- జరిమానా విధించారు. పట్టణాన్ని అపరిశుభ్రం చేస్తే ఉపేక్షించేది లేదని ఈ సందర్భంగా అధికారులు హెచ్చరించారు.

ఈ కార్యక్రమంలో మున్సిపల్ అధికారులు ఎం. అభినయ్ కుమార్ (డిప్యూటీ ఈఈ), గంగా ప్రసాద్ (ఏఈ), యాదగిరి, నర్సింహా, ఎన్విరాన్‌మెంట్ ఇంజనీర్ రాము మరియు పారిశుద్ధ్య సిబ్బంది పాల్గొన్నారు.