న్యూఢిల్లీ:

భారత ప్రధాని నరేంద్ర మోదీ అమెరికాతో కుదుర్చుకున్న నూతన వాణిజ్య ఒప్పందాన్ని నిరసిస్తూ జాతీయ యువజన కాంగ్రెస్ పిలుపు మేరకు ఢిల్లీలోని జంతర్ మంతర్ వద్ద భారీ నిరసన కార్యక్రమం జరిగింది. జాతీయ అధ్యక్షుడు ఉదయ్ భాను చిబ్, రాష్ట్ర అధ్యక్షుడు జక్కిడి శివచరణ్ ఆదేశాల మేరకు తెలంగాణ యువజన కాంగ్రెస్ రాష్ట్ర ప్రధాన కార్యదర్శి శివంత్ రెడ్డి ఆధ్వర్యంలో ఉమ్మడి మహబూబ్ నగర్ జిల్లా కాంగ్రెస్ యువజన అధ్యక్షులతో యువజన నాయకులతో పెద్ద ఎత్తున ఈ ఆందోళనలో పాల్గొన్నారు.

​అదానీ కేసుల వేళ.. ఈ ఒప్పందం వెనుక మర్మమేంటి?
​ఈ సందర్భంగా శివంత్ రెడ్డి మాట్లాడుతూ, కేంద్ర ప్రభుత్వ తీరుపై తీవ్ర విమర్శలు గుప్పించారు. అమెరికాలోని న్యూయార్క్ ఫెడరల్ కోర్టులో వ్యాపారవేత్త గౌతమ్ అదానీపై విచారణ వేగవంతమైన తరుణంలోనే ఈ ఒప్పందం కుదరడం పలు అనుమానాలకు తావిస్తోందని అన్నారు. ఒకవైపు అంతర్జాతీయంగా 'ఎప్స్టీన్ ఫైల్స్' సంచలనం సృష్టిస్తున్న వేళ, కేంద్రం హడావుడిగా ఈ ఒప్పందాన్ని ఎందుకు కుదుర్చుకుందని ఆయన ప్రశ్నించారు.

​ఈ వాణిజ్య ఒప్పందం వల్ల దేశీయ వ్యవసాయ రంగానికి జరిగే నష్టాన్ని ఆయన ఈ సందర్భంగా వివరించారు:

​ఇంధన సంక్షోభం: రష్యా, ఇరాన్ వంటి దేశాల నుంచి తక్కువ ధరకే చమురు పొందే అవకాశాలను ఈ ఒప్పందం దెబ్బతీసేలా ఉందని ఆందోళన వ్యక్తం చేశారు. ఇది దేశ ఆర్థిక వ్యవస్థపై భారంగా మారుతుందని హెచ్చరించారు.

​సుంకాల అసమానత: అమెరికా ఉత్పత్తులు భారత్‌లోకి సున్నా సుంకాలతో ప్రవేశిస్తుంటే, భారత ఉత్పత్తులపై అమెరికా మాత్రం అధిక సుంకాలు విధించడం అన్యాయమని, ఇది ఏకపక్ష ఒప్పందమని పేర్కొన్నారు.

​పోరాటం ఆగదు..
​కేంద్ర ప్రభుత్వం వెంటనే ఈ ప్రజా వ్యతిరేక ఒప్పందాన్ని పునఃసమీక్షించాలని, లేనిపక్షంలో యువజన కాంగ్రెస్ ఆధ్వర్యంలో దేశవ్యాప్త ఉద్యమం చేపడతామని నేతలు హెచ్చరించారు. ఈ కార్యక్రమంలో ఉమ్మడి మహబూబ్ నగర్ జిల్లాకు చెందిన పలువురు యువజన కాంగ్రెస్ నాయకులు, కార్యకర్తలు పాల్గొని కేంద్ర ప్రభుత్వానికి వ్యతిరేకంగా నినాదాలు చేశారు.