చెరువుల పరిరక్షణ పేరిట సామాన్యుడి గుడిసెపై గర్జించే ప్రభుత్వ 'బుల్డోజర్' బడాబాబుల కాంక్రీట్ కోటల ముందు నిలవలేకపోతున్నాయి.
అధికారులు అద్భుత సృజనాత్మకతతో 
పేదవాడి ఇండ్లను తెల్లారేసరికి కూల్చివేస్తూ..పెద్దలకు శాస్త్రీయ ఆధారాల్లేని నోటీసులు జారీ చేస్తున్నారు.హైడ్రా యాక్షన్ కార్పొరేట్ వద్దకు రాగానే మారిపోతుందది. శాస్త్రీయ పటాలు లేవు, సరిహద్దుల స్పష్టత లేదు.. కానీ ప్రచార ఆర్భాటాలకు మాత్రం కొదవ లేదు. చట్టం కళ్లు మూసుకుంటుందో లేదో కానీ, మన అధికారులు మాత్రం బడా బిల్డర్లను చూడగానే కళ్లు తేలేస్తున్నారు. అదే క్రమంలో పేదవాడిపై మాత్రం పగబడుతున్నారన్న విమర్శలు వస్తున్నాయి.

హైదరాబాద్:

హైదరాబాద్ నగరాన్ని వరదల నుంచి కాపాడుతాం, చెరువులను రక్షిస్తాం అంటూ ఆర్భాటంగా రంగంలోకి దిగిన హైడ్రా, జీహెచ్‌ఎంసీ, రెవెన్యూ, ఇరిగేషన్ శాఖల డొల్లతనం మరోసారి బట్టబయలైంది. చెరువుల పరిరక్షణ పేరుతో సామాన్యుల ఇళ్లను క్షణాల వ్యవధిలో కూల్చివేసే అధికారులు, బడా నిర్మాణ సంస్థలు, రాజకీయ పలుకుబడి ఉన్నవారి జోలికి వచ్చేసరికి చేతులెత్తేస్తున్నారు.
తాజాగా హుస్సేన్‌సాగర్ గరిష్ట నీటి మట్టం (ఎఫ్‌టీఎల్) పరిధిలో ఉందంటూ 'ప్రదీప్ కన్స్ట్రక్షన్' సంస్థకు జీహెచ్‌ఎంసీ జారీ చేసిన షోకాజ్ నోటీసులపై హైకోర్టు యథాతథ స్థితి (స్టేటస్ కో) విధించడం ప్రభుత్వ విభాగాల సమన్వయ లోపానికి, బలహీనమైన సన్నద్ధతకు అద్దం పడుతోంది. కోర్టు మెట్లు ఎక్కగానే ప్రభుత్వ యంత్రాంగం నీరుగారిపోవడం వెనుక ఉన్న అసలు అంతర్యం ఏమిటనే ప్రశ్నలు ఇప్పుడు సర్వత్రా వ్యక్తమవుతున్నాయి.

 *అసంపూర్ణ సర్వేలు: ఒక నిర్దిష్ట సర్వే నంబరులో ఉన్న భూమి ఎఫ్‌టీఎల్ పరిధిలోకి వస్తుందా లేదా అనేది నిర్ధారించడానికి డిజిటల్ గ్లోబల్ పొజిషనింగ్ సిస్టమ్ ఆధారిత శాస్త్రీయ పటాలను వాడాల్సి ఉంది. కానీ నీటిపారుదల శాఖ వద్ద ఉన్న పాత రికార్డులకు, రెవెన్యూ విభాగం వద్ద ఉన్న క్షేత్రస్థాయి సరిహద్దులకు పొంతన కుదరడం లేదు.

సామాన్యుడిపై ప్రతాపం.. బడాబాబులకు రక్షణ కవచం?
ప్రభుత్వ యంత్రాంగం అవలంబిస్తున్న తీరు సమాజంలో రెండు రకాల న్యాయ సూత్రాలు ఉన్నాయనే భావనను కలిగిస్తోంది.

కూల్చివేతల్లో వివక్ష స్పష్టం:
*నిరుపేదల ఇళ్లపై బుల్డోజర్లు: ఎలాంటి ముందస్తు నోటీసులు లేకుండా, ఒకవేళ ఇచ్చినా అప్పీలు చేసుకునే సమయం కూడా ఇవ్వకుండా సామాన్యుల, మధ్యతరగతి ప్రజల ఇళ్లను హైడ్రా కూల్చివేస్తోంది. తమ జీవితకాల సంపాదన అంతా ధారపోసి కొనుక్కున్న స్థలాలు నిమిషాల్లో శిథిలాలుగా మారుతుంటే బాధితులు రోదిస్తున్నారు.

*కోర్టుల అండతో బడా సంస్థల రక్షణ: అదే కార్పొరేట్ సంస్థలు, రాజకీయ పలుకుబడి ఉన్న బిల్డర్లు కోర్టుల నుంచి యథాతథ స్థితి ఉత్తర్వులు తెచ్చుకుని తమ పనులను యథేచ్ఛగా కొనసాగిస్తున్నారు. ప్రభుత్వ అధికారులు ఉద్దేశపూర్వకంగానే బలహీనమైన నోటీసులు జారీ చేస్తూ, కోర్టుల్లో బలమైన వాదనలు వినిపించకుండా వారికి పరోక్షంగా సహకరిస్తున్నారనే అనుమానాలు బలపడుతున్నాయి.

"రాజకీయ అంతర్యం ఏమిటి? అధికారుల బాధ్యతారాహిత్యంపై ప్రశ్నలు!
చెరువుల ఆక్రమణల నిర్మూలన కేవలం ప్రచారానికేనా? లేక నిజంగానే చిత్తశుద్ధి ఉందా? అన్నది ఇప్పుడు మిలియన్ డాలర్ల ప్రశ్న.
 1. శాస్త్రీయ సరిహద్దుల నిర్ధారణ ఏది?: ఇరిగేషన్, జీహెచ్‌ఎంసీ, రెవెన్యూ శాఖలు సంయుక్తంగా క్షేత్రస్థాయిలో శాస్త్రీయ పద్ధతిలో సరిహద్దు గుర్తింపు పూర్తి చేయకుండానే హడావుడిగా నోటీసులు ఎందుకు జారీ చేస్తున్నాయి?

 2.లీగల్ సిబ్బంది వైఫల్యం: ప్రభుత్వ న్యాయ విభాగం కోర్టుల్లో పక్కా ఆధారాలతో కౌంటర్లు దాఖలు చేయడంలో ఎందుకు వెనుకబడుతోంది? సరిపడా ఆధారాలు సేకరించకుండానే నోటీసులు జారీ చేయడం అధికారుల అనాలోచిత చర్య కాదా?

 3.రాజకీయ బడాబాబుల ఒత్తిళ్లు: పెద్ద పెద్ద నిర్మాణాల వెనుక ఉన్న అధికార, ప్రతిపక్ష రాజకీయ నాయకుల ప్రయోజనాలను కాపాడటానికే అధికారులు కోర్టుల్లో లొసుగులు వదిలేస్తున్నారా?
న్యాయస్థానంలో తదుపరి విచారణ నాటికైనా జీహెచ్‌ఎంసీ, నీటిపారుదల శాఖ అధికారులు శాస్త్రీయ ఆధారాలతో కూడిన కౌంటర్ దాఖలు చేస్తారా? లేక ఎప్పటిలాగే బడాబాబుల ప్రయోజనాల కోసం కేసును నీరుగారుస్తారా? అన్నది వేచి చూడాలి. చట్టం అందరికీ ఒకేలా వర్తింపజేసినప్పుడే ప్రభుత్వ చర్యలపై ప్రజల్లో విశ్వసనీయత ఉంటుంది.