*హైదరాబాద్:
రాష్ట్రంలో ప్రభుత్వ విద్యా రంగాన్ని బలోపేతం చేయాల్సిన ప్రభుత్వ విద్యాశాఖ, అందుకు విరుద్ధంగా ప్రైవేట్ విద్యా వ్యాపారాన్ని ప్రోత్సహించేలా నిర్ణయాలు తీసుకోవడంపై తీవ్ర విమర్శలు వ్యక్తమవుతున్నాయి. మేడ్చల్ జిల్లా నాచారంలోని ఢిల్లీ పబ్లిక్ స్కూల్ (DPS) వేదికగా ప్రభుత్వ ఉపాధ్యాయులకు రాష్ట్ర వనరుల వ్యక్తుల (State Resource Persons - SRP) శిక్షణా కార్యక్రమాలను నిర్వహించడం వివాదాస్పదంగా మారింది. ప్రభుత్వ విద్యా వ్యవస్థను కించపరిచే విధంగా ఉన్న ఈ శిక్షణా తరగతులను తక్షణమే రద్దు చేయాలని, ఇందుకు బాధ్యుడైన మేడ్చల్ జిల్లా విద్యాధికారిని (DEO) సస్పెండ్ చేయాలని డిమాండ్ చేస్తూ అఖిల భారత యువజన సమాఖ్య (AIYF) ఆధ్వర్యంలో శుక్రవారం సదరు పాఠశాల ముందు ప్లకార్డులతో నిరసన ధర్నా నిర్వహించారు.
*ప్రభుత్వ సంస్థలుండగా ప్రైవేట్ వేదికలెందుకు?
ఈ సందర్భంగా ఏఐవైఎఫ్ రాష్ట్ర ప్రధాన కార్యదర్శి కల్లూరు ధర్మేంద్ర మాట్లాడుతూ, ప్రభుత్వ పాఠశాలల్లో లక్షలాది మంది విద్యార్థులను తీర్చిదిద్దుతున్న ఉపాధ్యాయులకు శిక్షణ ఇచ్చేందుకు ప్రభుత్వ పరిధిలోనే ఉన్నత స్థాయి విద్యా సంస్థలు అందుబాటులో ఉన్నాయని గుర్తుచేశారు.
*శాస్త్రీయ వనరుల విస్మరణ:
విద్యా చట్టాలు, జాతీయ విద్యా ప్రణాళికా చట్రం (NCF) నిబంధనల ప్రకారం ప్రభుత్వ ఉపాధ్యాయులకు శిక్షణ ఇచ్చేందుకు నిర్దేశిత అకడమిక్ ప్రమాణాలు కలిగిన సంస్థలు ఉన్నాయి.
*SCERT (రాష్ట్ర విద్యా పరిశోధన - శిక్షణా మండలి)
*DIET(జిల్లా విద్యా - శిక్షణా సంస్థ)
*IASE (ఉన్నత విద్యా అధ్యయన సంస్థ)
*CTE (ఉపాధ్యాయ విద్యా కళాశాల)
ప్రజా ధనం... కార్పొరేట్ ప్రచారం!
ప్రస్తుతం ప్రభుత్వ పాఠశాలలు కనీస మౌలిక సదుపాయాల కొరత, ఉపాధ్యాయ ఖాళీలు, నిధుల లేమితో సతమతమవుతున్నాయని నిరసనకారులు పేర్కొన్నారు. ఇటువంటి పరిస్థితుల్లో ప్రజల పన్నుల రూపంలో వచ్చిన ప్రభుత్వ నిధులను ప్రభుత్వ సంస్థల బలోపేతానికి ఖర్చు చేయకుండా, ప్రైవేట్ విద్యాసంస్థల ప్రతిష్టను, ప్రచారాన్ని పెంచడానికి వినియోగించడం ఏమాత్రం సమర్థనీయం కాదన్నారు. జూలై 9 నుండి 11 వరకు నిర్వహించే ఈ శిక్షణా కార్యక్రమానికి సంబంధించి ఢిల్లీ పబ్లిక్ స్కూల్ను ఏ ప్రమాణాల ప్రాతిపదికన ఎంపిక చేశారు? ప్రభుత్వంతో జరిగిన ఒప్పందాలు, నిధుల వ్యయ వివరాలు ఏమిటి? అనే విషయాలను విద్యాశాఖ వెంటనే బహిర్గతం చేయాలని డిమాండ్ చేశారు.
*స్పందించకుంటే రాష్ట్రవ్యాప్త ఆందోళనలు
ప్రభుత్వ విద్యను బలహీనపరిచేలా తీసుకున్న ఈ నిర్ణయాన్ని వెనక్కి తీసుకోకపోతే రాష్ట్రవ్యాప్తంగా నిరసనలు ఉధృతం చేస్తామని ఏఐవైఎఫ్ హెచ్చరించింది. ఈ నిరసన ధర్నాలో ఏఐవైఎఫ్ జిల్లా ఉపాధ్యక్షుడు గిరిబాబు, శేఖర్, ప్రదీప్, ఏఐఎస్ఎఫ్ (AISF) ఉప్పల్ మండల అధ్యక్షుడు ఎండీ. అజీమ్ పాషా, కార్యదర్శి మహేష్ కుమార్, కార్యవర్గ సభ్యులు అలీ, ఇర్ఫాన్, సమీర్, కిరణ్, ఆశ్రఫ్, ఉమేష్, గణేష్, లోకేష్, ఉదీప్ తదితరులు పాల్గొన్నారు.
About The Author
.jpeg)
.jpeg)
.jpeg)
.jpeg)
