భారత శక్తి :

రాష్ట్రంలో ఓటర్ల వివరాల సేకరణ (సర్ - SIR) ప్రక్రియను మరింత వేగవంతం చేయాలని, ఎన్యూమరేషన్ (గణన) ఫారాల పంపిణీ కార్యక్రమాన్ని మంగళవారం (జూలై 7) నాటికి వంద శాతం పూర్తి చేయాలని రాష్ట్ర ప్రధాన ఎన్నికల అధికారి (సిఇఒ) సుదర్శన్ రెడ్డి జిల్లా కలెక్టర్లను ఆదేశించారు. సోమవారం అదనపు సిఇఒ వాసం వెంకటేశ్వర్లు రెడ్డితో కలిసి ఆయన జిల్లాల కలెక్టర్లతో ఉన్నత స్థాయి సమీక్షా సమావేశాన్ని (వీడియో కాన్ఫరెన్స్) నిర్వహించారు.
ఈ సందర్భంగా సుదర్శన్ రెడ్డి మాట్లాడుతూ.. నిర్దేశిత గడువులోగా ఫారాల పంపిణీ పూర్తి కావాలని స్పష్టం చేశారు. ముఖ్యంగా హైదరాబాద్, మేడ్చల్, రంగారెడ్డి జిల్లాలతో పాటు పట్టణ ప్రాంతాల కలెక్టర్లు దీనిపై ప్రత్యేక శ్రద్ధ వహించాలన్నారు.

*క్షేత్రస్థాయిలో సూపర్ వైజర్లదే కీలక పాత్ర!
ఎన్యూమరేషన్ ఫారాలను పకడ్బందీగా పూరించడంలో పర్యవేక్షకుల (సూపర్ వైజర్ల) పాత్ర అత్యంత కీలకమని సిఇఒ పేర్కొన్నారు.
 *బిఎల్ఒలకు అండగా: క్షేత్రస్థాయిలో ఎక్కడైనా బూత్ స్థాయి అధికారులు (బిఎల్ఒలు) బలహీనంగా ఉంటే, వారిని గుర్తించి ఫారాలు పూరించడంలో సూపర్ వైజర్లు సహాయం చేయాలి.
 *వాలంటీర్ల సహాయం:
 స్థానికంగా ఉండే స్వచ్ఛంద కార్యకర్తల (వాలంటీర్ల) గుర్తింపు ద్వారా ఓటర్లు తమ ఫారాలను సులభంగా పూర్తి చేసేలా సహకరించాలి.

*అదనపు హెల్ప్ డెస్క్‌ల ఏర్పాటు
హైదరాబాద్‌లో ఇప్పటికే అందుబాటులోకి వచ్చిన 16 సహాయ కేంద్రాలతో (హెల్ప్ డెస్క్‌లతో) పాటు, అవసరమైన ఇతర ప్రాంతాలలో కూడా అదనంగా సహాయ కేంద్రాలను ఏర్పాటు చేయాలని కలెక్టర్లను ఆదేశించారు. పూర్తి చేసిన ఫారాలలో ఓటరుతో పాటు బూత్ స్థాయి అధికారి (బిఎల్ఒ) సంతకాలు తప్పనిసరిగా ఉండాలని, ఫోటోలు కూడా సరిచూసుకోవాలని స్పష్టం చేశారు.

*ఒకే కేంద్రం పరిధిలోకి కుటుంబ ఓట్లు
పోలింగ్ కేంద్రాల సవరణ/పునర్విభజన (రేషనలైజేషన్) ప్రక్రియను కూడా పద్ధతి ప్రకారం చేపట్టాలని సిఇఒ సూచించారు. ఒకే కుటుంబానికి చెందిన ఓటర్ల పేర్లు వేర్వేరు పోలింగ్ కేంద్రాలలో కాకుండా, అందరి పేర్లు ఒకే కేంద్రం పరిధిలోకి వచ్చేలా జాగ్రత్తలు తీసుకోవాలన్నారు.
ఆన్‌లైన్ ద్వారా వచ్చిన దరఖాస్తులను కూడా బూత్ స్థాయి అధికారులు క్షుణ్ణంగా పరిశీలించాలని, ఫారాల భర్తీపై వారికి మరోసారి అవసరమైతే శిక్షణ ఇవ్వాలని కలెక్టర్లకు సూచించారు. బిఎల్ఒలు తప్పనిసరిగా రాజకీయ పార్టీల ప్రతినిధులతో సమావేశాలు ఏర్పాటు చేసి, ఈ సర్ ప్రక్రియపై వారికి పూర్తి అవగాహన కల్పించాలన్నారు.
ఈ ఉన్నత స్థాయి సమీక్షలో డిప్యూటీ ఎన్నికల అధికారి చారి, డిప్యూటీ కలెక్టర్ చెన్నయ్య, ఐటీ విభాగం ప్రతినిధి చిరంజీవి తదితర ఉన్నతాధికారులు పాల్గొన్నారు