*హైదరాబాద్: 
తెలంగాణ ఉద్యమకారుల చిరకాల డిమాండ్లను పరిష్కరించడంలో ప్రభుత్వం అనుసరిస్తున్న ఉదాసీన వైఖరికి నిరసనగా ఒక భారీ కార్యాచరణకు రంగం సిద్ధమైంది. ఉద్యమకారుల సమస్యల సాధనకై 'తెలంగాణ ఐక్య కార్యాచరణ సమితి' (TUJAC) ఆధ్వర్యంలో అతి త్వరలోనే రాష్ట్ర సచివాలయ ముట్టడి కార్యక్రమాన్ని ఆకస్మికంగా చేపట్టనున్నట్లు సంఘం రంగారెడ్డి జిల్లా అధ్యక్షుడు, న్యాయవాది మహేష్ బాబు చోల్లేటి ప్రకటించారు.
ప్రభుత్వం నియమించిన కమిటీల తీరు, ఉద్యమకారుల పట్ల జరుగుతున్న నిర్లక్ష్యాన్ని నిరసిస్తూ ఈ నిర్ణయం తీసుకున్నట్లు ఆయన పేర్కొన్నారు.

*ఉద్యమకారుల ఆగ్రహానికి ప్రధాన కారణాలు:
 *ఉద్యమకారులకు అవమానం: ప్రభుత్వం ఏర్పాటు చేసిన తెలంగాణ ఉద్యమకారుల గుర్తింపు (కేకే) కమిటీ చర్చల ప్రక్రియలో, ఉద్యమకారులను కావాలనే చిట్టచివర్లో చేర్చి వారిని అవమానపరిచే విధంగా వ్యవహరిస్తోంది.
 *కాలపరిమితి లేని కమిటీ: ఈ కేకే కమిటీ విధివిధానాలకు సంబంధించి ఎలాంటి నిర్దిష్ట కాలపరిమితిని నిర్ణయించకపోవడం ప్రభుత్వ ఉద్దేశాన్ని శంకింపజేస్తోంది.
 *ప్రాతినిధ్యం కరవు: అసలైన ఉద్యమ సంఘాలకు ఈ కమిటీలో ఎలాంటి స్థానం కల్పించలేదు.
 *మహిళా ఉద్యమకారుల నిర్లక్ష్యం: ఉద్యమంలో కీలక పాత్ర పోషించిన మహిళా ఉద్యమకారులకు ఈ కమిటీలో కనీస ప్రాతినిధ్యం దక్కలేదు.

 *నిర్దిష్ట దరఖాస్తు పత్రం లేకపోవడం: హక్కుల కోసం దరఖాస్తు చేసుకుందామన్నా, ఉద్యమకారులకు ఇప్పటివరకు ఎలాంటి నిర్దిష్ట దరఖాస్తు పత్రాన్ని (అప్లికేషన్ ఫామ్) అందుబాటులో ఉంచలేదు.
 *ఇళ్ల స్థలాల సర్వే నత్తనడక: ఉద్యమకారులకు కేటాయించాల్సిన ఇళ్ల స్థలాలకు సంబంధించి ఇప్పటివరకు కనీస ప్రాథమిక సర్వే కూడా నిర్వహించకపోవడం శోచనీయం.