హైదరాబాద్:

రాష్ట్రంలో అవినీతి అధికారుల గుండెల్లో అవినీతి నిరోధక శాఖ (ఏసీబీ) అధికారులు మరోసారి వణుకు పుట్టించారు. ప్రభుత్వ ఆదాయానికి గండి కొడుతూ, తమ అధికార పరిధిని అడ్డం పెట్టుకుని కోట్లాది రూపాయల అక్రమాస్తులు కూడబెట్టారనే నమ్మదగిన సమాచారంతో ఏసీబీ బలగాలు రంగంలోకి దిగాయి. హైదరాబాద్ మహానగర అభివృద్ధి సంస్థ (హెచ్ఎండీఏ) చీఫ్ ఇంజనీర్ బచ్చు రవీందర్ లక్ష్యంగా మంగళవారం తెల్లవారుజాము నుంచే అధికారులు ముమ్మర దాడులు నిర్వహించారు. ఈ ఆకస్మిక తనిఖీలు రాష్ట్రవ్యాప్తంగా తీవ్ర కలకలం రేపాయి.

*పక్కా నిఘా.. వ్యూహాత్మక దాడులు
గత కొంతకాలంగా రవీందర్‌పై పెద్ద ఎత్తున అవినీతి, అక్రమ సంపాదనకు సంబంధించిన ఆరోపణలు వస్తున్నాయి. ఈ నేపథ్యంలో ఏసీబీ ఉన్నతాధికారులు ఆయన కదలికలపై రహస్యంగా నిఘా పెట్టారు. ప్రాథమిక విచారణలో అందిన శాస్త్రీయ ఆధారాలు, సేకరించిన నివేదికల ఆధారంగా దాడులకు వ్యూహం సిద్ధం చేశారు. ఏసీబీ డీఎస్పీ మాజీద్ అలీఖాన్ నేతృత్వంలోని ప్రత్యేక బృందాలు మంగళవారం సూర్యోదయానికి ముందే రంగంలోకి దిగాయి. రవీందర్ నివాసంతో పాటు ఆయన బంధువులు, అత్యంత సన్నిహితుల ఇళ్లే లక్ష్యంగా ఏకకాలంలో మొత్తం 12 ప్రాంతాల్లో ఈ సోదాలు ప్రారంభమయ్యాయి.

*తప్పు చేస్తే వదిలేదే లేదు: ఏసీబీ ఉన్నతాధికారులు.
"నిరుపేదల సొమ్మును, ప్రభుత్వ ఖజానాను కొల్లగొట్టే ఎంతటి ఉన్నతాధికారైనా చట్టం ముందు మోకరిల్లాల్సిందే. పక్కా ఆధారాలు, శాస్త్రీయ విచారణతోనే ఈ దాడులు చేపట్టాం. అవినీతి నిరోధమే మా లక్ష్యం" అని ఏసీబీ ఉన్నతాధికార వర్గాలు స్పష్టం చేశాయి.