"ఆజాద్‌గా పుట్టాను.. ఆజాద్‌గానే మరణిస్తాను.." అన్న సింహగర్జనతో బ్రిటిష్ సామ్రాజ్యాన్ని గడగడలాడించిన ధీశాలి, భారత విప్లవ వీరుడు చంద్రశేఖర్ ఆజాద్ గారి వర్ధంతి నేడు. ఆయన కేవలం ఒక వ్యక్తి కాదు.. ఆరు అడుగుల అగ్నిపర్వతం!

"ఆజాద్" అంటే స్వతంత్రుడు. పేరుకు తగ్గట్టుగానే పరాయి పాలనలో తలవంచని మహావీరుడు ఆయన. 1906 జూలై 23న జన్మించిన ఈ యువ కిశోరం, కేవలం 15 ఏళ్ల వయసులోనే బ్రిటిష్ కోర్టులో నిలబడి.. "నీ పేరేమిటి?" అని జడ్జి అడిగితే.. "ఆజాద్" (స్వతంత్రుడు) అని, "నీ తండ్రి పేరేమిటి?" అంటే "స్వతంత్ర" అని, "నీ ఇల్లు ఎక్కడ?" అంటే "జైలు" అని బదులిచ్చిన పిడుగు ఆయన. అన్యాయాన్ని చూసి సహించని ఆజాద్, భగత్ సింగ్, సుఖ్‌దేవ్‌ వంటి వీరులతో కలిసి 'హిందూస్థాన్ సోషలిస్ట్ రిపబ్లికన్ అసోసియేషన్' ద్వారా సాయుధ పోరాటాన్ని ప్రారంభించారు.

కాకోరి రైలు దోపిడీ ద్వారా బ్రిటిష్ ఖజానాకు కన్నం వేసి సవాల్ విసిరారు. లాలా లజపత్ రాయ్ మరణానికి ప్రతీకారంగా సాండర్స్ ను హతమార్చి భారతీయుల పౌరుషాన్ని చాటారు. 1931 ఫిబ్రవరి 27.. అల్హాబాద్‌లోని ఆల్ఫ్రెడ్ పార్క్ (నేటి ఆజాద్ పార్క్) రణక్షేత్రంగా మారింది. వందలాది మంది బ్రిటిష్ పోలీసులు ఆజాద్‌ను చుట్టుముట్టారు. ఒక్కడే సింహంలా పోరాడారు. తన తుపాకీలో బుల్లెట్లు ఉన్నంతవరకు శత్రువుల గుండెల్లో వణుకు పుట్టించారు. చివరగా ఒక్క బుల్లెట్ మిగిలినప్పుడు.. శత్రువు చేతికి చిక్కకూడదని, తనను తాను కాల్చుకుని భారత మాత ఒడిలో అమరుడయ్యారు. "మనం శత్రువుల తూటాలను ఎదుర్కొంటాం.. మనం స్వేచ్ఛగా ఉన్నాం.. స్వేచ్ఛగానే ఉంటాం!" ఆజాద్ మరణం భారత యువతలో విప్లవ జ్వాలలు నింపింది. ఆయన చిందించిన ప్రతి రక్తపు బొట్టు ఒక నిప్పుకణమై దేశాన్ని రగిల్చింది. నేటి యువత ఆజాద్ చూపిన ధైర్యాన్ని, దేశభక్తిని స్ఫూర్తిగా తీసుకోవాలి.
భారతమాత ముద్దుబిడ్డకు ఘన నివాళులు.. ఇన్కిలాబ్ జిందాబాద్.. ఆజాద్ అమర్ హై.. జై హింద్..