బడంగ్‌పేట్:
బడంగ్‌పేట్ పరిధిలో ఓటర్ల జాబితా ప్రత్యేక ముమ్మర సవరణ ప్రక్రియను పారదర్శకంగా నిర్వహించేందుకు ఎన్నికల విభాగం సిద్ధమైంది. ఈ ప్రక్రియపై స్థానిక ప్రతినిధులకు అవగాహన కల్పించేందుకు శుక్రవారం (జూలై 3) ఉదయం 10:30 గంటలకు బడంగ్‌పేట్ సర్కిల్ కార్యాలయ సమావేశ మందిరంలో ఒక ప్రత్యేక సమావేశాన్ని ఏర్పాటు చేశారు.
ఈ సమావేశానికి బడంగ్‌పేట్ పరిధిలోని అన్ని కాలనీల అధ్యక్షులు, కార్యదర్శులు తప్పనిసరిగా హాజరుకావాలని బడంగ్‌పేట్ సర్కిల్ ఎన్నికల విభాగం డిప్యూటీ కమిషనర్ ఆదేశించారు.

*138 పోలింగ్ కేంద్రాల్లో జాబితా ప్రక్షాళన
బడంగ్‌పేట్ సర్కిల్ పరిధిలోని మొత్తం 138 పోలింగ్ కేంద్రాలలో ఓటర్ల జాబితాను పూర్తిస్థాయిలో ప్రక్షాళన చేయడమే ఈ ముమ్మర సవరణ ముఖ్య ఉద్దేశం. అర్హులైన ప్రతి ఒక్కరికీ ఓటు హక్కు కల్పించడంతో పాటు, జాబితాలో ఎలాంటి తప్పులు లేకుండా నిష్పాక్షికంగా రూపొందించేందుకు ఈ క్రింది చర్యలు తీసుకోనున్నారు:
 *కొత్త ఓటర్ల నమోదు: ఓటు హక్కు రాని అర్హులందరినీ ఓటర్లుగా చేర్చడం.

 *తప్పుల సవరణ: పేర్లు, వయస్సు, చిరునామాల్లో దొర్లిన తప్పులను సరిదిద్దడం.

*'వారసుల అనుసంధానం'పై ప్రత్యేక దృష్టి
ఈ సవరణ ప్రక్రియలో భాగంగా కుటుంబంలో కొత్తగా ఓటు హక్కు సాధించిన వారసుల వివరాలను వారి తల్లిదండ్రుల ఓట్లతో అనుసంధానం చేసే (మ్యాపింగ్ ప్రొజని) నూతన విధానంపై ఈ సమావేశంలో ప్రత్యేకంగా అవగాహన కల్పించనున్నారు. దీనివల్ల ఒకే కుటుంబంలోని ఓట్లన్నీ ఒకే పోలింగ్ కేంద్రం పరిధిలోకి వచ్చే అవకాశం ఉంటుంది.

*కాలనీ అసోసియేషన్ల పాత్ర కీలకం:
స్థానిక కాలనీలలో అర్హులైన ప్రతి ఒక్కరికీ ఓటు హక్కు కల్పించేలా, ఓటర్ల జాబితా దోషరహితంగా ఉండేలా చూసేందుకు కాలనీ అసోసియేషన్ ప్రతినిధులు క్రియాశీలక పాత్ర పోషించాలని, రేపు జరిగే అవగాహన సమావేశాన్ని విజయవంతం చేయాలని డిప్యూటీ కమిషనర్ కోరారు.