హైదరాబాద్:
తెలంగాణలోని క్రిస్టియన్ మైనారిటీల ఆర్థిక సాధికారత, స్వయం ఉపాధి, జీవనోపాధి అవకాశాలను మెరుగుపరిచే దిశగా రాష్ట్ర ప్రభుత్వం మరో కీలక ముందడుగు వేసింది. క్రిస్టియన్ మైనారిటీల ఆర్థిక సంస్థ ఆధ్వర్యంలో రూపొందించిన ‘ఆన్‌లైన్ లబ్ధిదారుల నిర్వహణ మరియు పర్యవేక్షణ వ్యవస్థ’ (OBMMS) పోర్టల్‌ను రాష్ట్ర మైనారిటీల సంక్షేమ, ప్రభుత్వ రంగ సంస్థల శాఖ మంత్రి మహమ్మద్ అజారుద్దీన్ శుక్రవారం డాక్టర్ బి.ఆర్. అంబేద్కర్ తెలంగాణ సచివాలయంలోని తన కార్యాలయంలో అధికారికంగా ప్రారంభించారు.
ఈ సరికొత్త డిజిటల్ వ్యవస్థ ద్వారా క్రిస్టియన్ మైనారిటీ మహిళల కోసం కుట్టు మిషన్ల పంపిణీ, నిరుద్యోగుల కోసం మోటార్ బైక్, ఈ-బైక్, స్కూటీ, ఈ-స్కూటర్ల సరఫరా, అలాగే చిన్న వ్యాపారాల (పెట్టీ బిజినెస్) నిర్వహణకు అందించే సంక్షేమ పథకాల ఆన్‌లైన్ దరఖాస్తు ప్రక్రియ అందుబాటులోకి వచ్చింది.

*పారదర్శక పాలనే లక్ష్యం: మంత్రి మహమ్మద్ అజారుద్దీన్
ఈ సందర్భంగా మంత్రి మహమ్మద్ అజారుద్దీన్ మాట్లాడుతూ, ముఖ్యమంత్రి ఎ. రేవంత్ రెడ్డి నాయకత్వంలోని ప్రభుత్వం మైనారిటీల సంక్షేమానికి, ఆర్థికాభివృద్ధికి అత్యంత ప్రాధాన్యత ఇస్తోందని స్పష్టం చేశారు. పూర్తి పారదర్శకతతో, ఆధునిక సాంకేతికతను ఉపయోగించుకుంటూ ప్రజలకు సులభంగా సేవలు అందించడమే లక్ష్యంగా ఈ ఆన్‌లైన్ విధానాన్ని తెచ్చినట్లు పేర్కొన్నారు. ఈ పథకాలు మైనారిటీ యువత, మహిళలు స్వయం ఉపాధి సాధించి, ఆర్థికంగా స్థిరపడటానికి ఎంతో దోహదపడతాయన్నారు.
ఈ కార్యక్రమంలో ప్రభుత్వ మైనారిటీల సలహాదారు మహ్మద్ షబ్బీర్ అలీ, క్రిస్టియన్ మైనారిటీల ఆర్థిక సంస్థ అధ్యక్షుడు దీపక్ జాన్, మైనారిటీల సంక్షేమ శాఖ ప్రధాన కార్యదర్శి బి. షఫీయుల్లా, మైనారిటీల సంక్షేమ శాఖ సంచాలకుడు అబ్దుల్ హమీద్, ఆర్థిక సంస్థ నిర్వాహక సంచాలకురాలు పి. సబిత, హైదరాబాద్ జిల్లా కలెక్టర్‌తో పాటు పలువురు ఉన్నతాధికారులు పాల్గొన్నారు.

*దరఖాస్తుల స్వీకరణ వివరాలు
అర్హులైన క్రిస్టియన్ మైనారిటీ అభ్యర్థులు జూలై 3 నుండి జూలై 18 సాయంత్రం 5:00 గంటల వరకు tsobmms.cgg.gov.in వెబ్‌సైట్ ద్వారా ఆన్‌లైన్‌లో దరఖాస్తు చేసుకోవాలని అధికారులు సూచించారు.

 *కుటుంబ వార్షిక ఆదాయం: పట్టణ ప్రాంతాల వారికి రూ. 2 లక్షలు, గ్రామీణ ప్రాంతాల వారికి రూ. 1.50 లక్షల లోపు ఉండాలి.