హైదరాబాద్: 

ఎల్బీనగర్ నియోజకవర్గ పరిధిలో మంగళవారం ఆధ్యాత్మిక చైతన్యం, మానవతా దృక్పథం మేళవించిన అరుదైన ఘట్టాలు ఆవిష్కృతమయ్యాయి. సరస్వతి నగర్ కాలనీలోని శ్రీ ప్రసన్న ఆంజనేయ స్వామి దేవాలయంలో జరిగిన విశేష పూజలు, అలాగే ప్రముఖ సామాజిక కార్యకర్త పెద్ది శంకర్ ఆధ్వర్యంలో నడుస్తున్న వృద్ధాశ్రమంలో జరిగిన సేవా కార్యక్రమాల్లో ప్రముఖ ఆధ్యాత్మిక  గురువు త్రిదండి అహోబిల రామానుజ జీయర్ స్వామి పాల్గొని భక్తులకు, నిర్వాహకులకు దిశా నిర్దేశం చేశారు.

*పెద్ది శంకర్ సేవా నిరతికి జీయర్ స్వామి అభినందనలు
ఆలయ కార్యక్రమం అనంతరం, జీయర్ స్వామి ‘రెడీ టూ సర్వ్ ఫౌండేషన్’ ఆధ్వర్యంలో పెద్ది శంకర్ నిర్వహిస్తున్న ఓల్డ్ ఏజ్ హోమ్‌ను సందర్శించారు. ఈ సందర్భంగా ఆశ్రమ నిర్వాహకులు పెద్ది శంకర్ స్వామివారికి ఘన స్వాగతం పలికారు. ఆశ్రమంలో ఆశ్రయం పొందుతున్న వృద్ధులను ఆప్యాయంగా పలకరించి, వారి యోగక్షేమాలను అడిగి తెలుసుకున్న స్వామివారు.. వృద్ధులకు అండగా నిలుస్తున్న పెద్ది శంకర్ సేవా భావాన్ని ప్రత్యేకంగా అభినందించారు. ఆశ్రమ నిర్వహణ కోసం తన వంతుగా ఆర్థిక సహాయాన్ని అందజేసి ఉదారత చాటుకున్నారు.

నెరవేరనున్న సొంత స్థలం కల: పెద్ది శంకర్ ధీమా
ఈ సందర్భంగా ఆశ్రమ నిర్వాహకులు పెద్ది శంకర్ మాట్లాడుతూ.. జీయర్ స్వామివారి పావన చరణాల స్పర్శతో తమ ఆశ్రమం పావనమైందని ఆనందం వ్యక్తం చేశారు. స్వామివారి ఆశీస్సులతో ఓల్డ్ ఏజ్ హోమ్‌కు సొంత స్థలాన్ని సమకూర్చుకోవాలనే తమ చిరకాల వాంఛ త్వరలోనే సాకారం కానుందనే గట్టి నమ్మకాన్ని ఆయన వ్యక్తపరిచారు.