హైదరాబాద్:

నగరంలోని హాస్టళ్లలో ఉంటున్న వేలాది మంది విద్యార్థులు, ఉద్యోగుల భద్రత విషయంలో ఏమాత్రం నిర్లక్ష్యం వహించినా సహించేది లేదని హైడ్రా కమిషనర్ ఏవీ రంగనాథ్ స్పష్టం చేశారు. ముఖ్యంగా ఫైర్ సేఫ్టీ (అగ్ని భద్రత) విషయంలో హాస్టల్ నిర్వాహకులు రాజీ పడకూడదని, నిబంధనలు ఉల్లంఘిస్తే కఠిన చర్యలు తప్పవని హెచ్చరించారు. మంగళవారం హైదరాబాద్‌లో హాస్టల్ నిర్వాహకులకు అగ్ని ప్రమాదాలపై నిర్వహించిన అవగాహన సదస్సులో ఆయన ముఖ్య అతిథిగా ప్రసంగించారు.

​క్షేత్రస్థాయిలో ఆందోళనకర పరిస్థితులు
​సమావేశానికి ముందు కమిషనర్ స్వయంగా ఎల్లారెడ్డిగూడ, సంజీవరెడ్డి నగర్ ప్రాంతాల్లోని మూడు హాస్టళ్లను ఆకస్మికంగా తనిఖీ చేశారు. ఆ అనుభవాలను నిర్వాహకులతో పంచుకుంటూ ఆయన ఆవేదన వ్యక్తం చేశారు. "చిన్న గదుల్లో సామర్థ్యానికి మించి బెడ్లు వేయడం, సెల్లార్లలో మెస్‌లు నిర్వహించడం అత్యంత ప్రమాదకరం. భద్రత కోసం కిటికీలకు వేసిన గ్రిల్స్‌కు తాళాలు వేసి ఉంచుతున్నారు. ప్రమాదం జరిగితే బయటకు వచ్చే దారి కూడా లేని పరిస్థితి కనిపిస్తోంది. కనీసం ఫైర్ ఎక్స్టింగ్విషర్లు కూడా లేకపోవడం గమనార్హం" అని ఆయన వేలెత్తి చూపారు.

​వేసవి కాలం వస్తున్న నేపథ్యంలో అగ్ని ప్రమాదాల ముప్పు ఎక్కువగా ఉంటుందని, చిన్నపాటి జాగ్రత్తలతో ప్రాణనష్టాన్ని నివారించవచ్చని రంగనాథ్ సూచించారు.

​అవగాహన: విద్యుత్ వినియోగంపై జాగ్రత్త వహించడంతో పాటు, సిబ్బందికి అగ్నిమాపక పరికరాల వాడకంపై శిక్షణ ఇవ్వాలి.

​అండగా ఉంటాం: నిర్వాహకుల హామీ
​హైడ్రా సూచనలను తూచా తప్పకుండా పాటిస్తామని సైబరాబాద్ హాస్టళ్ల యజమానుల సంఘం ప్రతినిధులు అమర్‌నాథ్ రెడ్డి, కరుణాకర్ ఈ సందర్భంగా హామీ ఇచ్చారు. నగర ప్రతిష్ఠను పెంచడంలో తాము కూడా భాగస్వాములమవుతామని పేర్కొన్నారు. ఈ కార్యక్రమంలో హైడ్రా అదనపు డైరెక్టర్ వర్ల పాపయ్య, ఆర్.ఎఫ్.ఓ జయప్రకాష్, డీ.ఎఫ్.ఓలు యజ్ఞనారాయణ, గౌతమ్ తదితరులు పాల్గొన్నారు.