హైదరాబాద్:

మహిళల భద్రతకు తాము 'ఉక్కు కవచం' అని మల్కాజిగిరి కమిషనరేట్ షీ టీమ్స్ మరోసారి నిరూపించాయి. రోడ్లపై తిరిగే పోకిరీలనే కాదు.. డిజిటల్ తెర వెనుక దాక్కుని వేధించే 'కీచకుల' గుట్టును రట్టు చేస్తున్నాయి. తాజాగా డీసీపీ (ఉమెన్ సేఫ్టీ) టి. ఉషారాణి విడుదల చేసిన గణాంకాలు చూస్తుంటే, నగరంలో మహిళల రక్షణ కోసం పోలీసులు ఎంతటి పకడ్బందీ నిఘా ఏర్పాటు చేశారో అర్థమవుతోంది.

​ఖైదీలుగా మారిన కీచకులు:
​గడిచిన 15 రోజుల్లో (జనవరి 16-31) షీ టీమ్స్ నిర్వహించిన డెకాయ్ ఆపరేషన్లలో 81 మంది కీచకులు చిక్కారు. బస్టాండ్లు, రైల్వే స్టేషన్లు, కాలేజీల వద్ద సామాన్య దుస్తుల్లో ఉండే మహిళా పోలీసులు ఆకతాయిల చేష్టలను రికార్డ్ చేసి, ఆధారాలతో సహా వారిని అదుపులోకి తీసుకుంటున్నారు. పట్టుబడిన వారిలో 25 మంది మైనర్లు ఉండటం సమాజంలో నైతిక విలువల పతనాన్ని సూచిస్తోంది. వీరికి వారి తల్లిదండ్రుల ముందే కౌన్సెలర్లతో 'క్లాస్' పీకిస్తున్నారు.

​మహిళలు ఒంటరిగా ప్రయాణిస్తుంటే కొందరు డ్రైవర్లు వక్రబుద్ధి ప్రదర్శిస్తున్నారు.

​ఆటో డ్రైవర్ అరాచకం: చార్జీల విషయంలో గొడవపడి, యువతిని భయపెట్టిన ర్యాపిడో ఆటో డ్రైవర్ ఉదంతం ప్రయాణీకుల భద్రతపై ప్రశ్నలు లేవనెత్తింది. బాధితురాలు వాట్సాప్ ద్వారా ఫిర్యాదు చేసిన కొద్ది నిమిషాల్లోనే పోలీసులు రంగంలోకి దిగి నిందితుడిని పట్టేసుకున్నారు.

​సామాజిక మాధ్యమాలే శాపమా?

​ప్రస్తుతం అందుతున్న ఫిర్యాదుల్లో సగానికి పైగా డిజిటల్ వేధింపులే కావడం గమనార్హం.
​"ఫోన్ కాల్స్ ద్వారా 28 మంది, సోషల్ మీడియా ద్వారా 26 మంది వేధింపులకు గురయ్యారు. ప్రేమ పేరుతో బ్లాక్‌మెయిల్ చేయడం, వ్యక్తిగత ఫోటోలతో బెదిరించడం వంటి అరాచకాలపై పోలీసులు ఉక్కుపాదం మోపుతున్నారు."

​మెట్రోలోనూ నిఘా నేత్రం:

​మహిళల కోచ్‌లలోకి చొరబడే పురుష పుంగవుల పీచమణిచేందుకు షీ టీమ్స్ మెట్రో రైళ్లలోనూ నిరంతరం తనిఖీలు చేస్తున్నాయి. ఈ మధ్యకాలంలో నలుగురు వ్యక్తులు మహిళల కంపార్ట్‌మెంట్‌లో ప్రయాణిస్తూ పట్టుబడటంతో వారికి భారీ జరిమానాలు విధించారు.

​మీ వెంటే మేమున్నాం.. భయం వద్దు!

​"మహిళల గౌరవానికి భంగం కలిగిస్తే ఎవరినీ వదిలిపెట్టే ప్రసక్తే లేదు. వేధింపులు ఎదురైనప్పుడు మౌనంగా భరించవద్దు" అని డీసీపీ ఉషారాణి పిలుపునిచ్చారు.

​సాయం కోసం సంప్రదించండి:
​వాట్సాప్ నంబర్: 87126 62111
​ఏరియా షీ టీమ్స్: ఎల్బీనగర్ (8712662602), ఉప్పల్ (8712665299), మల్కాజిగిరి (8712662603).