​ఒక ఊరిలో దొంగల భయం ఎక్కువైందని, ఊరి పెద్ద ఒక అత్యాధునిక 'డిజిటల్ తాళం' కనిపెట్టాడు. "ఇకపై ఎవరూ లోపలికి రాలేరు, అంతా పారదర్శకం" అని ఊరంతా చాటాడు. కట్ చేస్తే.. ఆ తాళం చెవి దొంగల చేతిలోనే ఉంది! లోపల సామాన్యుడి సొమ్ము లూటీ అవుతుంటే, బయట మాత్రం తాళం భలే మెరుస్తోంది అని ఊరి పెద్ద మురిసిపోతున్నాడు. 'బిల్డ్ నౌ' పరిస్థితి కూడా సరిగ్గా ఇలాగే ఉంది—సాఫ్ట్‌వేర్ ముసుగులో లోపల జరుగుతున్నది మాత్రం పక్కా 'సిస్టమిక్' దోపిడీ!

​(హైదరాబాద్ -  పరిశోధనాత్మక పాత్రికేయులు ఎం వేణుగోపాల్ వి.జీ)

హైదరాబాద్:

"​TDR స్కామ్: నివాస స్థలానికి 'వాణిజ్య' విలువ!

​మోసం ఇలా: ఒక ప్రాంతంలో నివాస స్థలం (Residential) కోల్పోయిన వ్యక్తికి ఆ విలువ ప్రకారమే TDR ఇవ్వాలి. కానీ, దళారులు సబ్-రిజిస్ట్రార్ కార్యాలయం నుంచి అదే సర్వే నంబర్‌కు కమర్షియల్ (వాణిజ్య) వాల్యూ సర్టిఫికెట్‌ను సృష్టిస్తున్నారు.

​అధికారుల పాత్ర: టౌన్ ప్లానింగ్ అధికారులు ఈ నకిలీ కమర్షియల్ వాల్యూను ధ్రువీకరిస్తూ భారీ విలువ గల TDRలను మంజూరు చేస్తున్నారు. దీనివల్ల ప్రభుత్వానికి రావాల్సిన కోట్లాది రూపాయల ఫీజులు ఎగ్గొట్టడమే కాకుండా, మార్కెట్లో ఆ సర్టిఫికెట్లను అమ్మి అక్రమంగా కోట్లు గడిస్తున్నారు.

​చీకటి పోర్టల్.. అంతుచిక్కని ఫైల్ కదలిక!

​గతంలో అమల్లో ఉన్న DPMS, TG-bPASS వ్యవస్థల్లో దరఖాస్తు ఏ అధికారి వద్ద ఉందో ప్రజలకు తెలిసేది. కానీ 'బిల్డ్ నౌ'లో ట్రాకింగ్ సిస్టమ్‌ను కావాలనే తొలగించారనే ఆరోపణలు వస్తున్నాయి.

​గోప్యత ఎవరి కోసం?: 
ఫైల్ ఏ టేబుల్ మీద ఉందో తెలియకపోవడంతో దరఖాస్తుదారులు అధికారుల చుట్టూ, దళారుల చుట్టూ తిరగాల్సి వస్తోంది.

​షార్ట్‌ఫాల్స్ పేరిట వేధింపులు: చిన్న చిన్న కారణాలతో ఫైళ్లను పెండింగ్‌లో పెట్టి, ఏజెంట్ల ద్వారా 'ముడుపులు' ముడితేనే క్లియర్ చేస్తున్నారు.
 ఏఐ (AI) సాంకేతికతను పారదర్శకత కోసం కాకుండా, బాధ్యత నుంచి తప్పించుకోవడానికి అధికారులు డాలుగా వాడుకుంటున్నారు.

​నిషేధిత భూముల్లోనూ అనుమతుల జాతర!

​'బిల్డ్ నౌ'లో డేటా బహిరంగంగా అందుబాటులో లేకపోవడంతో అధికారులు బరితెగిస్తున్నారు.

​ప్రభుత్వ భూములు: నాలా (Nala) కన్వర్షన్ లేకపోయినా, ప్రభుత్వ నిషేధిత జాబితాలో ఉన్న భూములకు కూడా దొడ్డిదారిన అనుమతులు ఇస్తున్నారు.
​భద్రతకు తిలోదకాలు: ఫైర్ సేఫ్టీ నిబంధనలు పాటించని ఆసుపత్రులు, పాఠశాలలకు సైతం భారీ వసూళ్లకు
పాల్పడి ఆక్యుపెన్సీ సర్టిఫికెట్లు (OC) జారీ చేస్తున్నారు.

​మార్టిగేజ్ ఎగవేత: ప్రభుత్వానికి తాకట్టు పెట్టాల్సిన స్థలాన్ని చూపకుండానే అనుమతులు మంజూరు చేస్తూ బిల్డర్లతో కుమ్మక్కవుతున్నారు.

​న్యాయస్థానాలకు సైతం సవాల్!

​ఈ వ్యవస్థలో అతిపెద్ద లోపం ఏమిటంటే.. ఒక అక్రమ అనుమతిపై కోర్టుకు వెళ్లినా, ఏ అధికారి ఆ నిర్ణయం తీసుకున్నారో నిరూపించడం కష్టతరం చేశారు. డిజిటల్ సంతకాలు, అస్పష్టమైన సాఫ్ట్‌వేర్ లాగ్‌ల వల్ల తప్పు చేసిన అధికారిని గుర్తించడం న్యాయస్థానాలకు కూడా సవాలుగా మారింది. ఇది ఉన్నతాధికారులు పక్కా ప్రణాళికతో చేసిన 'సిస్టమిక్ కరప్షన్' అని నిపుణులు హెచ్చరిస్తున్నారు.

​డిజిటల్ బినామీలు.. ఏజెంట్ల రాజ్యం!

​ప్రతి మున్సిపల్ కార్యాలయంలో అధికారుల కంటే ప్రైవేట్ వ్యక్తుల (ఏజెంట్ల) హవాయే ఎక్కువగా ఉంది. ఏసీబీ దాడుల నుంచి తప్పించుకోవడానికి అధికారులు ఈ ఏజెంట్ల ద్వారానే డీల్స్ కుదుర్చుకుంటున్నారు. టెక్నాలజీ తెలిసిన ఈ ప్రైవేట్ వ్యక్తులే 'బిల్డ్ నౌ' లాగిన్లను హ్యాండిల్ చేస్తూ అక్రమాలకు పాల్పడుతున్నారనేది బహిరంగ రహస్యం.

​ప్రభుత్వం తక్షణమే చేయాల్సింది:
​పబ్లిక్ డొమైన్: ప్రతి అనుమతికి సంబంధించిన పూర్తి వివరాలు, లోపాలు, మరియు అధికారి పేరును వెబ్‌సైట్‌లో ప్రజలకు అందుబాటులో ఉంచాలి.

​TDR ఆడిట్: గత రెండేళ్లలో జారీ చేసిన అన్ని TDRల వాల్యూయేషన్‌పై స్పెషల్ ఇన్వెస్టిగేషన్ టీమ్ (SIT) తో విచారణ జరిపించాలి.

​లైవ్ ట్రాకింగ్: సామాన్యుడి దరఖాస్తు ఏ స్థితిలో ఉందో తెలిపే రియల్ టైమ్ ట్రాకింగ్ సిస్టమ్‌ను మళ్ళీ పునరుద్ధరించాలి.
​
సాంకేతికత అంటే సామాన్యుడికి మేలు చేసేదిగా ఉండాలి కానీ, అధికారుల అక్రమార్జనకు అడ్డదారిగా మారకూడదు. మరి ఈ ‘బ్రిబ్ నౌ’ దందాపై ప్రభుత్వం ఎప్పుడు ఉక్కుపాదం మోపుతుందో వేచి చూడాలి.