శిథిలావస్థ భవనాలపై 'హైడ్రా' నజర్

ప్రమాదకర కట్టడాలపై సమాచారానికి హెల్ప్‌లైన్ నంబరు విడుదల

On 01 May 2026 10:20:30

హైదరాబాద్:

నగరంలో జనసంచారం ఉన్న ప్రాంతాల్లో శిథిలావస్థకు చేరిన భవనాల వల్ల ప్రాణనష్టం జరగకుండా 'హైడ్రా' (HYDRAA) ముందస్తు చర్యలు చేపట్టింది. కూలడానికి సిద్ధంగా ఉన్న పాత కట్టడాలను గుర్తించి, వాటిని సురక్షితంగా తొలగించడం ద్వారా ప్రమాదాలను నివారించాలని నిర్ణయించింది. ఈ మేరకు ప్రజలు తమ పరిసరాల్లోని ప్రమాదకర భవనాల గురించి సమాచారం అందించాలని కోరుతూ *9000113667* హెల్ప్‌లైన్ నంబరును ప్రకటించింది.

అప్రమత్తతే రక్షణ
ఇటీవల బెంగళూరులోని శివాజీనగర్‌లో కురిసిన భారీ వర్షానికి ఓ ప్రహరీ గోడ కూలి ఏడుగురు మృతి చెందిన ఘటనను హైడ్రా ఈ సందర్భంగా ప్రస్తావించింది. హైదరాబాద్‌లోనూ గతంలో ఇటువంటి ప్రమాదాలు చోటుచేసుకున్న నేపథ్యంలో, అకాల వర్షాల వల్ల పాత భవనాలు కూలే ప్రమాదం ఉందని హెచ్చరించింది.
* కేవలం వర్షాకాలంలోనే కాకుండా, ఎప్పుడైనా ప్రమాదం జరిగే అవకాశం ఉన్నందున ప్రజలు అప్రమత్తంగా ఉండాలి.
* మున్సిపల్ కార్పొరేషన్ల నుంచి ఇప్పటికే సమాచారం సేకరిస్తున్నామని, ప్రజలు కూడా ఇందులో భాగస్వాములు కావాలని కోరింది.

వివరాలు పంపాల్సిన విధానం
ప్రమాదకరంగా ఉన్న భవనం లేదా కట్టడం ఏ ప్రాంతంలో ఉందో తెలుపుతూ, దానికి సంబంధించిన ఫోటో, కరెంట్ లొకేషన్‌ను పై నంబరుకు వాట్సాప్ ద్వారా పంపాలని సూచించింది.

గోప్యత పాటిస్తాం:
శిథిలావస్థలో ఉన్న కట్టడాల గురించి సమాచారం అందించిన వారి వివరాలను అత్యంత గోప్యంగా ఉంచుతామని హైడ్రా స్పష్టం చేసింది. సమాచారం అందిన వెంటనే క్షేత్రస్థాయిలో పరిశీలించి తగిన చర్యలు తీసుకోనున్నట్లు వెల్లడించింది.