మహేశ్వరం:
ప్రభుత్వాలు అధికార అహంకారంతో, రాజకీయ ప్రతీకారంతో వ్యవహరిస్తూ కేసులు పెట్టే ధోరణికి హైకోర్టు తీర్పు ఒక గట్టి హెచ్చరిక అని మాజీ మంత్రి, మహేశ్వరం ఎమ్మెల్యే సబితా ఇంద్రారెడ్డి పేర్కొన్నారు. గురువారం మహేశ్వరంలోని ఎమ్మెల్యే క్యాంపు కార్యాలయంలో ఏర్పాటు చేసిన విలేకరుల సమావేశంలో ఆమె మాట్లాడారు. కేసీఆర్ ఎలాంటి తప్పు చేయలేదని న్యాయస్థానం స్పష్టం చేయడంతో తమ నమ్మకం బలపడిందని, తెలంగాణ ప్రజలు ఇప్పటికే ఈ విషయాన్ని గుర్తించారని ఆమె అన్నారు.

అభివృద్ధికి కేసీఆర్ కేరాఫ్ అడ్రస్
తెలంగాణ ఏర్పడక ముందు ఈ ప్రాంతంపై ఎన్నో అనుమానాలు ఉండేవని, కానీ కేసీఆర్ ముఖ్యమంత్రిగా బాధ్యతలు చేపట్టాక రాష్ట్రం అభివృద్ధిలో కొత్త పుంతలు తొక్కిందని సబితా గుర్తు చేశారు. ఏ చర్చ జరిగినా గంటల తరబడి రైతుల సంక్షేమం గురించే ఆలోచించే గొప్ప నాయకుడు కేసీఆర్ అని కొనియాడారు. ప్రపంచంలోనే అతిపెద్ద లిఫ్ట్ ఇరిగేషన్ ప్రాజెక్టు అయిన కాళేశ్వరం ద్వారా రైతులకు నీరు అందించాలనే సంకల్పంతో అద్భుత నిర్మాణాలు చేపట్టారని తెలిపారు.

నిర్లక్ష్యం వీడాలి.. మరమ్మతులు చేపట్టాలి*
కాళేశ్వరం ప్రాజెక్టుపై లక్షల కోట్ల అవినీతి జరిగిందంటూ ప్రభుత్వం చేస్తున్న ప్రచారాన్ని ఆమె ఖండించారు. "భారీ ఇన్‌ఫ్రాస్ట్రక్చర్ ప్రాజెక్టులకు ఖర్చులు సహజంగానే ఎక్కువగా ఉంటాయి. వాటిని సద్వినియోగం చేసుకోవడం మానేసి, ప్రాజెక్టులు కూలిపోవాలని కోరుకోవడం ప్రభుత్వ బాధ్యతారాహిత్యం" అని విమర్శించారు. మేడిగడ్డ బ్యారేజీలో దెబ్బతిన్న భాగాలను మరమ్మతులు చేసేందుకు కాంట్రాక్టర్ ముందుకు వచ్చినా, ప్రభుత్వం నిబంధనల పేరుతో అడ్డుకోవడం దారుణమని మండిపడ్డారు.

ప్రభుత్వానికి డిమాండ్లు:*
 1. మేడిగడ్డ బ్యారేజీకి తక్షణమే మరమ్మతులు చేపట్టి రైతులకు సాగునీరు అందించాలి.
 2. మిషన్ భగీరథను సమర్థంగా నిర్వహించి తాగునీటి సమస్యను పరిష్కరించాలి.
 3. కోతల్లేని నిరంతర విద్యుత్ సరఫరాను పునరుద్ధరించాలి.
 4. రైతు సంక్షేమ పథకాలను ఎటువంటి ఆంక్షలు లేకుండా వెంటనే అమలు చేయాలి.
న్యాయస్థానం తీర్పు రాజ్యాంగ విలువలను కాపాడే సంకేతమని, ఇప్పటికైనా ప్రభుత్వం రాజకీయ కక్షలను పక్కన పెట్టి ప్రజా సమస్యలపై దృష్టి సారించాలని ఆమె డిమాండ్ చేశారు.