ఎల్బీనగర్:

 పేదల సంక్షేమమే కాంగ్రెస్ ప్రజా ప్రభుత్వ ప్రధాన లక్ష్యమని టీపీసీసీ ప్రచార కమిటీ చైర్మన్, మాజీ ఎంపీ మధుయాష్కి గౌడ్ అన్నారు. శుక్రవారం కొత్తపేటలోని రాధా మానసిక వికలాంగుల సంస్థలో వికలాంగుల కార్పొరేషన్ ఆధ్వర్యంలో ఏర్పాటు చేసిన కార్యక్రమంలో ఆయన పాల్గొని లబ్ధిదారులకు త్రిచక్ర వాహనాలు (స్కూటీలు) పంపిణీ చేశారు. ఈ కార్యక్రమంలో ఎమ్మెల్సీ బొగ్గారపు దయానంద్, రోడ్డు అభివృద్ధి సంస్థ చైర్మన్ మల్రెడ్డి రాంరెడ్డి, ఎల్బీనగర్ ఎమ్మెల్యే దేవిరెడ్డి.సుధీర్ రెడ్డి  పాల్గొన్నారు.

అభివృద్ధి, సంక్షేమమే బాట
ఈ సందర్భంగా మధుయాష్కి గౌడ్ మాట్లాడుతూ.. సీఎం రేవంత్ రెడ్డి నాయకత్వంలో రాష్ట్రం అభివృద్ధి, సంక్షేమం పథంలో దూసుకుపోతోందని చెప్పారు. దివ్యాంగులకు వాహనాలతో పాటు భద్రత కోసం హెల్మెట్లను కూడా అందజేసినట్లు తెలిపారు. శిశు సంక్షేమ శాఖ సిబ్బందికి విధుల్లో సౌలభ్యం కోసం ఫోన్లు పంపిణీ చేశారు. స్వయం ఉపాధిని ప్రోత్సహించేందుకు మైనారిటీలకు కుట్టు మిషన్లు, ఈ-స్కూటర్లు కూడా ప్రభుత్వం అందిస్తోందని గుర్తు చేశారు.

హాజరైన ప్రజాప్రతినిధులు
కార్యక్రమంలో సీడీపీఓ రేణుక, డీడీఆర్సీ రమేష్, మాజీ కార్పొరేటర్లు వజీర్ ప్రకాష్ గౌడ్, రాగుల వెంకటేశ్వర రెడ్డి, నాయకులు లింగాల కిషోర్ గౌడ్, సురేందర్ రెడ్డి, శ్రీపాల్ రెడ్డి, వేణుగోపాల్ యాదవ్, రవీందర్ గౌడ్, అశోక్ గౌడ్, నేలపాటి రామారావు, జయపాల్ రెడ్డి, గణేష్ నాయక్, భవాని శంకర్, ప్రవీణ్ గౌడ్, రామకృష్ణ రెడ్డి తదితరులు పాల్గొన్నారు.