అల్మాస్ గూడ ప్రధాన రహదారి విస్తరణ పనులకు మోక్షం

On 30 Apr 2026 10:34:43

నిలిచిపోయిన పనులను వెంటనే ప్రారంభించాలి: రాఘవేందర్ రెడ్డి
క్షేత్రస్థాయిలో పరిశీలించి హామీ ఇచ్చిన బడంగ్‌పేట్ డీసీ సమ్మయ్య

అల్మాస్ గూడ ప్రధాన రహదారి విస్తరణ పనులకు మోక్షం

బడంగ్‌పేట్:

మహేశ్వరం నియోజకవర్గం నాదర్‌గుల్ డివిజన్ పరిధిలోని అల్మాస్ గూడ శివాజీ చౌక్ నుంచి అంబేద్కర్ సెంటర్ వరకు ఉన్న ప్రధాన రహదారి సమస్య పరిష్కారానికి అధికారులు సానుకూలంగా స్పందించారు. ఈ రహదారి అత్యంత ఇరుకుగా ఉండటంతో వాహనదారులు నిత్యం ప్రమాదాలకు గురవుతున్నారని ఏఐసీసీ విచార్ విభాగ్ కో-ఆర్డినేటర్ బోయపల్లి రాఘవేందర్ రెడ్డి అధికారుల దృష్టికి తీసుకెళ్లారు. గతంలోనే పనులు ప్రారంభమైనప్పటికీ మధ్యలోనే నిలిచిపోవడంతో ఎదురవుతున్న ఇబ్బందులను వివరించారు.

క్షేత్రస్థాయిలో పరిశీలన
రాఘవేందర్ రెడ్డి ఫిర్యాదుపై బడంగ్‌పేట్ సర్కిల్ డీసీ సమ్మయ్య బుధవారం ఆ ప్రాంతాన్ని స్వయంగా సందర్శించారు. రహదారి పరిస్థితిని, ట్రాఫిక్ ఇబ్బందులను క్షుణ్ణంగా పరిశీలించారు. నిలిచిపోయిన విస్తరణ పనులను యుద్ధ ప్రాతిపదికన ప్రారంభించి, వీలైనంత త్వరగా పూర్తి చేస్తామని ఈ సందర్భంగా ఆయన హామీ ఇచ్చారు.

డ్రైనేజీ సమస్యల పరిష్కారానికి వినతి
రహదారి సమస్యతో పాటు పలు కాలనీల్లోని డ్రైనేజీ ఇబ్బందులను కూడా అధికారులు గుర్తించారు.

* సౌభాగ్య నగర్, స్వేచ్ఛ నివాస్
* వినాయక హిల్స్, శ్రీ శ్రీ హోమ్స్
* జయశంకర్ కాలనీ
ఈ ప్రాంతాల్లో ఉన్న డ్రైనేజీ సమస్యలను రాఘవేందర్ రెడ్డి అధికారులకు వివరించారు. వీటికి శాశ్వత పరిష్కారం చూపిస్తామని శానిటేషన్ డీఈ అభినవ్ పేర్కొన్నారు.

కోమటికుంట చెరువు సుందరీకరణ
కోమటికుంట చెరువు పరిసరాల్లో పేరుకుపోయిన చెత్తాచెదారాన్ని పూర్తిగా తొలగించాలని డీసీ అధికారులను ఆదేశించారు. చెరువు పరిసరాలను శుభ్రం చేసి, స్థానిక ప్రజల కోసం వాకింగ్ ట్రాక్‌గా అభివృద్ధి చేస్తామని వెల్లడించారు.
ఈ కార్యక్రమంలో స్థానిక నాయకులు శ్రీను ధనావత్, బాలాజీ రావు, వెంకట్, ఎడ్ల శ్రీనివాస్ రెడ్డి, పొనుగోటి రావు, సామయ్య, యాదయ్య, లక్ష్మణ్, రఘు తదితరులు పాల్గొన్నారు.