హైదరాబాద్:

జర్నలిస్టుల ఇళ్ల స్థలాల వ్యవహారంలో ప్రభుత్వం అనుసరిస్తున్న వైఖరిపై గ్రేటర్ హైదరాబాద్ జర్నలిస్ట్స్ హౌసింగ్ సొసైటీ (జీహెచ్‌జేహెచ్ ఎస్) ఆగ్రహం వ్యక్తం చేసింది. అర్హులైన జర్నలిస్టుల హక్కులను కాలరాస్తూ, ఉద్దేశపూర్వకంగా వివక్ష చూపుతున్నారని సొసైటీ అధ్యక్ష, కార్యదర్శులు మామిడి సోమయ్య, బొల్లం శ్రీనివాస్ ధ్వజమెత్తారు. బుధవారం నిర్వహించిన ఒక ప్రకటనలో ప్రభుత్వ తీరును వారు తీవ్రంగా ఖండించారు.

కుట్రపూరితంగానే దూరం!
ఇళ్ల స్థలాల అంశంపై చర్చించేందుకు సచివాలయంలో మంత్రి పొంగులేటి శ్రీనివాస్ రెడ్డి నేతృత్వంలో ఇటీవల నిర్వహించిన కీలక సమావేశానికి తమ సొసైటీని ఆహ్వానించకపోవడం వెనుక కుట్ర దాగి ఉందని వారు ఆరోపించారు. రాష్ట్రంలోని కేవలం నాలుగు సొసైటీల ప్రతినిధులను మాత్రమే పిలిచి, 1350 మంది సభ్యులున్న అతిపెద్ద సొసైటీని పక్కన పెట్టడం వెనుక ఉన్న శక్తులను ఎండగడతామని హెచ్చరించారు. 2008లో ఏర్పాటై, గ్రేటర్ హైదరాబాద్ పరిధిలో దశాబ్దాలుగా పనిచేస్తున్న జర్నలిస్టులతో కూడిన తమ సంస్థను విస్మరించడం బాధాకరమని పేర్కొన్నారు.

 *హెచ్చరిక:* హక్కుల సాధన కోసం ప్రభుత్వంపై యుద్ధానికైనా సిద్ధం కావాలని సభ్యులకు పిలుపునిచ్చారు.
జర్నలిస్టుల సంక్షేమం పేరుతో పక్షపాతం చూపిస్తే సహించేది లేదని, తమ సభ్యుల ప్రయోజనాల కోసం ఎలాంటి ఆందోళనలకైనా వెనుకాడబోమని వారు ఈ సందర్భంగా హెచ్చరించారు.