నాంపల్లి:

కాంగ్రెస్‌ పార్టీకి సేవాదళ్ కార్యకర్తలే పునాది అని, పార్టీ సిద్ధాంతాలను ప్రజల్లోకి తీసుకెళ్లడంలో వారు కీలక పాత్ర పోషిస్తున్నారని టీపీసీసీ ప్రచార కమిటీ చైర్మన్, మాజీ ఎంపీ మధుయాష్కి గౌడ్ పేర్కొన్నారు. నాంపల్లి ఎగ్జిబిషన్ గ్రౌండ్స్‌లో నిర్వహించిన తెలంగాణ ప్రదేశ్ కాంగ్రెస్ సేవాదళ్ 'సమర్థ్ - శిక్షణ శిబిరం' కార్యక్రమానికి శుక్రవారం ఆయన ముఖ్యఅతిథిగా హాజరయ్యారు. ఈ సందర్భంగా సేవాదళ్ జెండాను ఆవిష్కరించి, కార్యకర్తల గౌరవ వందనాన్ని స్వీకరించారు.

స్వాతంత్ర్య పోరాటంలో కీలక పాత్ర
దేశ స్వాతంత్ర్య ఉద్యమంలో సేవాదళ్ పోషించిన పాత్ర మరువలేనిదని మధుయాష్కి అన్నారు. జవహర్ లాల్ నెహ్రూ వంటి నాయకులు కూడా సేవాదళ్‌లో పనిచేసిన వారేనని ఈ సందర్భంగా గుర్తు చేశారు. పార్టీ అధికారంలో ఉన్నా, లేకున్నా కార్యకర్తలు సొంత ఖర్చులతో పార్టీ బలోపేతానికి కృషి చేస్తున్నారని ప్రశంసించారు. రాష్ట్రంలో కాంగ్రెస్ అధికారంలోకి రావడానికి వీరి సమిష్టి కృషి ఎంతో దోహదపడిందని ఆయన పేర్కొన్నారు.

విభజన రాజకీయాలపై పోరాటం
బీజేపీ, ఆర్‌ఎస్‌ఎస్‌లు అనుసరిస్తున్న మతపరమైన విభజన రాజకీయాలను అడ్డుకునే శక్తి సేవాదళ్‌కు ఉందన్నారు. రాజ్యాంగ విలువలను కాపాడుతూ, సమాజంలో సామరస్యాన్ని పెంపొందించే దిశగా కార్యకర్తలు మరింత చురుగ్గా పనిచేయాలని పిలుపునిచ్చారు. సేవాదళ్ బలోపేతానికి రాష్ట్ర అధ్యక్షుడు మిద్దెల జితేందర్ చేస్తున్న కృషిని ఆయన అభినందించారు.
ఈ కార్యక్రమంలో సేవాదళ్ రాష్ట్ర అధ్యక్షుడు మిద్దెల జితేందర్, క్యాంపు కోఆర్డినేటర్ దేవేందర్ శర్మ, ఏఐసీసీ కోఆర్డినేటర్ సమాద్, ప్రతినిధులు శ్రావణ్ కుమార్, అఫ్సర్ యూసఫ్, గోవింద్ రావు, వాజీద్ మెహక్, మంకాల దాస్, అంజిరెడ్డి తదితరులు పాల్గొన్నారు.