*హైదరాబాద్:

సర్వోన్నత న్యాయస్థానం (సుప్రీంకోర్టు) తీర్పుతో సంబంధం లేకుండా, వర్కింగ్ జర్నలిస్ట్స్ చట్టం ప్రకారం అన్ని విభాగాల జర్నలిస్టులకు ప్రభుత్వం వెంటనే ఇళ్ల స్థలాలు కేటాయించాలని గ్రేటర్ హైదరాబాద్ జర్నలిస్ట్స్ మ్యూచువల్లీ ఎయిడెడ్ కో-ఆపరేటివ్ హౌసింగ్ సొసైటీ సర్వసభ్య సమావేశం డిమాండ్ చేసింది.
హైదరాబాద్ చిక్కడపల్లిలోని శ్రీ త్యాగరాయ గానసభ ప్రధాన వేదికపై బుధవారం సొసైటీ అధ్యక్షుడు మామిడి సోమయ్య అధ్యక్షతన ఈ సర్వసభ్య సమావేశం జరిగింది. ఈ సందర్భంగా జర్నలిస్టుల ఇళ్ల స్థలాలు, న్యాయస్థానం తీర్పులు, ప్రభుత్వ వైఖరిపై సుదీర్ఘంగా చర్చించి పలు కీలక తీర్మానాలు చేశారు. రాష్ట్రంలో నూతన ప్రభుత్వం అధికారంలోకి వచ్చి రెండున్నరేళ్లు కావస్తున్నా.. జర్నలిస్టుల ఇళ్ల స్థలాల సమస్య పరిష్కారం కాకపోవడంపై సీనియర్ జర్నలిస్టులు ఆందోళన వ్యక్తం చేశారు. గ్రేటర్ జర్నలిస్ట్స్ హౌసింగ్ సొసైటీకి లేదా అందులోని సభ్యులకు తక్షణమే ఇళ్ల స్థలాలు కేటాయించాలని కోరుతూ ముఖ్యమంత్రి రేవంత్ రెడ్డికి విజ్ఞప్తి చేస్తూ తీర్మానం ఆమోదించారు.

*వివక్ష లేకుండా 'ఫ్యూచర్ సిటీ'లో స్థలాలు ఇవ్వాలి
అక్రెడిటేషన్ కార్డులతో సంబంధం లేకుండా అర్హులైన ప్రతి జర్నలిస్టుకు ఇళ్ల స్థలం ఇవ్వాలని, ఈ విషయంలో ఎలాంటి వివక్ష చూపకూడదని సమావేశం కోరింది. గ్రేటర్ హైదరాబాద్ పరిధిలో పనిచేస్తున్న అన్ని విభాగాల జర్నలిస్టులకు 'ఫ్యూచర్ సిటీ'లో 200 చదరపు గజాల స్థలాన్ని కేటాయించాలని డిమాండ్ చేశారు.

*
అనివార్య కారణాల వల్ల ఈ సమావేశానికి నేరుగా హాజరుకాలేకపోయిన శాసనమండలి సభ్యుడు (ఎంఎల్సీ) ప్రొఫెసర్ కోదండరామ్ ఫోన్ ద్వారా తన సందేశాన్ని వినిపించారు. గ్రేటర్ జర్నలిస్టుల హౌసింగ్ సొసైటీ డిమాండ్లకు తన పూర్తి మద్దతు ఉంటుందని ప్రకటించారు. ముఖ్యమంత్రితో మాట్లాడి జర్నలిస్టులకు ఇళ్ల స్థలాలు దక్కేలా కృషి చేస్తానని హామీ ఇచ్చారు. అలాగే, అత్యవసర విధి నిర్వహణ వల్ల హాజరుకాలేకపోయిన రాజ్యసభ సభ్యుడు ఎం. అనిల్ కుమార్ యాదవ్ సైతం సొసైటీ తీర్మానాలకు తన మద్దతును తెలియజేశారు.
అంతకుముందు సొసైటీ కార్యదర్శి బొల్లం శ్రీనివాస్ వార్షిక నివేదికను సమర్పించారు. ఈ సమావేశంలో రాజకీయ నేత నైశిదం సత్యనారాయణ మూర్తి, తెలంగాణ జనసమితి గ్రేటర్ బీసీ విభాగం అధ్యక్షుడు జశ్వంత్, సీనియర్ జర్నలిస్టులు తీగవరపు శాంతి, నాగవాణి, సొసైటీ కోశాధికారి తన్నీరు శ్రీనివాస్, పాలకుల మండలి సభ్యులు (డైరెక్టర్లు) యర్రమిల్లి రామారావు, రమాదేవి తదితరులు పాల్గొన్నారు.