హైదరాబాద్:

సినిమాల్లో నటన తప్ప నిజజీవితంలో ప్రజాసేవ అంటే ఏంటో తెలియని పవన్ కళ్యాణ్‌కు తెలంగాణ నేలపై అడుగుపెట్టే హక్కు లేదని తెలంగాణ వెనుకబడిన తరగతుల (బీసీ) సంక్షేమ సంఘం రాష్ట్ర అధ్యక్షులు, టిఆర్ఎస్ పార్టీ నాయకులు అల్లంపల్లి రామకోటి తీవ్రస్థాయిలో ధ్వజమెత్తారు. శనివారం హైదరాబాద్‌లో జరిగిన ఒక సమావేశంలో ఆయన మాట్లాడుతూ.. పవన్ కళ్యాణ్ వైఖరిని, ఆయన రాజకీయ విధానాలను తీవ్రంగా తప్పుపట్టారు.

*భోగాల జీవితం నీది.. ప్రజాక్షేత్రంలో నీ త్యాగాలేంటి?
"పవన్ కళ్యాణ్.. నీకు ఆంధ్రప్రదేశ్‌లోనే ప్రజలు ఓట్లు వేయడం వృథా. ఎందుకంటే నీ జీవితం మొత్తం చలనచిత్రాల్లో నటనకే సరిపోయింది తప్ప, నిజజీవితంలో సమాజం కోసం నువ్వు చేసిందేమీ లేదు. ప్రజాక్షేత్రంలో నీవు చేసిన త్యాగాలేంటో చెప్పాలి. నీ జీవితమంతా భోగ భాగ్యాలతోనే గడిచింది. అటువంటి విలాసవంతమైన జీవితాన్ని అనుభవించిన నువ్వు.. ఈరోజు తెలంగాణకు వచ్చి రాజకీయ జెండాలు పాతతామంటే ఇక్కడి సమాజం చూస్తూ ఊరుకోదు" అని రామకోటి హెచ్చరించారు.

 *విద్యార్థుల సమస్యలపై మౌనం ఎందుకు?: పేద విద్యార్థుల కోసం ఎప్పుడైనా విద్యావేతనాలు (స్కాలర్‌షిప్‌లు) ఇప్పించావా? ప్రభుత్వ రుసుముల రీఇంబర్స్‌మెంట్ కోసం ఎప్పుడైనా రోడ్డు ఎక్కి పోరాటం చేశావా? వసతి గృహాల (హాస్టల్) సౌకర్యాలు కల్పించాలని కనీసం ఒక్క రోజైనా ధర్నా చేశావా?

 *మా దృష్టిలో నువ్వు కేవలం 'ఆంధ్ర పవన్ కళ్యాణ్‌'వి మాత్రమే: నువ్వు చలనచిత్ర కథానాయకుడివి కావు.. పొరుగు రాష్ట్ర ఉపముఖ్యమంత్రివి అంతకన్నా కావు. మా దృష్టిలో నువ్వు కేవలం 'ఆంధ్ర పవన్ కళ్యాణ్' వి మాత్రమే అని రామకోటి స్పష్టం చేశారు.

*ఇది అమరవీరుల త్యాగాల గడ్డ.. జాగ్రత్త!
ఒకప్పుడు ఇక్కడ రాజకీయంగా ఉర్రూతలూపిన చంద్రబాబును, జగన్‌ను, షర్మిలను సైతం వెనక్కి పంపించిన గడ్డ తెలంగాణ అని ఆయన గుర్తుచేశారు. ఇది వేలాది మంది అమరవీరుల త్యాగాలతో సిద్ధించిన ప్రత్యేక రాష్ట్రమని, ఇక్కడికి వచ్చి ప్రాంతీయ విభేదాలు సృష్టించాలని చూస్తే ఊరుకునేది లేదన్నారు. "ఆంధ్ర పవన్ కళ్యాణ్ తెలంగాణకు రావడానికి వీల్లేదు, ఇక్కడ జెండాలు పాతడానికి వీల్లేదు. రాసిపెట్టుకో... జాగ్రత్త పవన్ కళ్యాణ్ జాగ్రత్త!" అంటూ రామకోటి హెచ్చరించారు.