*హైదరాబాద్:

తెలంగాణ రాష్ట్రం గత ఏడాది రబీ సీజన్ నాటి రికార్డు స్థాయి వరి కొనుగోళ్లను అధిగమించేందుకు సిద్ధమైంది. రాష్ట్రంలో ఇప్పటికే 70.06 లక్షల మెట్రిక్ టన్నుల ధాన్యం కొనుగోళ్లు పూర్తయ్యాయని, ఈ సారి మొత్తం సేకరణ 75 లక్షల మెట్రిక్ టన్నుల మార్కును దాటే అవకాశం ఉందని పౌరసరఫరాల శాఖ మంత్రి ఉత్తమ్ కుమార్ రెడ్డి ప్రకటించారు.
ప్రస్తుతం కొనుగోలు కేంద్రాల్లో మరో 4.95 లక్షల మెట్రిక్ టన్నుల ధాన్యం సిద్ధంగా ఉందని, వచ్చే వారంలో పొలాల నుండి వచ్చే అదనపు దిగుబడులను కూడా లెక్కిస్తే.. గత ఏడాది నమోదైన 74.2 లక్షల మెట్రిక్ టన్నుల రికార్డు తుడిచిపెట్టుకుపోవడం ఖాయమని ధీమా వ్యక్తం చేశారు. రాష్ట్రవ్యాప్తంగా సాగుతున్న కొనుగోలు ప్రక్రియపై ఉన్నతాధికారులతో నిర్వహించిన సమీక్షా సమావేశంలో ఆయన మాట్లాడారు. ధాన్యం సేకరణలో ఎక్కడా ఆటంకాలు కలగకుండా, ఇబ్బందులు ఉన్న చోట యుద్ధప్రాతిపదికన సమస్యలను పరిష్కరించాలని జిల్లా కలెక్టర్లను, పౌరసరఫరాల అధికారులను ఆదేశించారు.

*వానాకాలం ముందే వరి సేకరణ పూర్తి కావాలి
రాబోయే రోజుల్లో వర్షాలు పడే అవకాశం ఉండటం, కొన్ని జిల్లాల్లో పంట ఆలస్యంగా చేతికి రావడంపై మంత్రి ప్రత్యేకంగా చర్చించారు. ముఖ్యంగా నిజామాబాద్, నిర్మల్, నాగర్‌కర్నూల్, వనపర్తి, వికారాబాద్ జిల్లాల్లో రాబోయే పది రోజుల పాటు ధాన్యం రాక కొనసాగే అవకాశం ఉన్నందున, అక్కడ ప్రత్యేక నిఘా పెట్టాలన్నారు. "నైరుతి రుతుపవనాలు దేశంలోకి ప్రవేశించి ఊపందుకోక ముందే ఈ జిల్లాల్లో కొనుగోళ్లు పూర్తి చేయాలి. వాతావరణ మార్పుల వల్ల రైతులు ఎట్టి పరిస్థితుల్లోనూ నష్టపోకూడదు" అని స్పష్టం చేశారు. ఇప్పటికే సూర్యాపేట, నల్గొండ జిల్లాల్లో కొనుగోళ్లు చివరి దశకు చేరాయని, మరో ఒకటి రెండు రోజుల్లో అక్కడ ప్రక్రియ ముగుస్తుందని తెలిపారు.
ధాన్యం నిల్వ ఉంచే గోదాముల కొరత రాకుండా అదనపు స్థలాలను గుర్తించినట్లు అధికారులు ఈ సమావేశంలో వెల్లడించారు. అలాగే, మిల్లింగ్ చేసిన బియ్యం (కస్టమ్ మిల్లింగ్ రైస్) రవాణాను వేగవంతం చేసి, కొత్త ధాన్యానికి స్థలం దొరికేలా చూడాలని మంత్రి ఆదేశించారు.

 ఇందిరమ్మ ఇళ్లలో ప్రాధాన్యం: అర్హులైన కార్మికులను గుర్తించి, వారికి 'ఇందిరమ్మ గృహాలు' పథకం కింద ఇళ్లు కేటాయించేందుకు ప్రత్యేక డ్రైవ్ చేపట్టాలని సూచించారు. లబ్ధిదారుల ఎంపికలో వీరికి మొదటి ప్రాధాన్యత ఇవ్వాలన్నారు.