హైదరాబాద్:

రాష్ట్రంలో సంచలనం సృష్టించిన ఫోన్ ట్యాపింగ్ వ్యవహారంలో ప్రత్యేక విచారణ బృందం (సిట్) విచారణ వేగవంతం చేసింది. ఇందులో భాగంగా బడంగ్‌పేట్ మున్సిపల్ కార్పొరేషన్ మాజీ మేయర్ చిగురింత పారిజాత నరసింహారెడ్డి దంపతులు బుధవారం సిట్ అధికారుల ఎదుట హాజరయ్యారు. విచారణ అనంతరం ఆమె మీడియాతో మాట్లాడారు.
సుమారు 30 నిమిషాల పాటు సిట్ అధికారులు తమ స్టేట్‌మెంట్‌ను రికార్డ్ చేశారని పారిజాత తెలిపారు. 2022వ సంవత్సరం నుంచి గత అసెంబ్లీ ఎన్నికల సమయం వరకు తమ ఇద్దరి ఫోన్లు ట్యాపింగ్‌కు గురైనట్లు అధికారులు ప్రాథమికంగా నిర్ధారించారని ఆమె పేర్కొన్నారు.

*అధికారులు చెప్పే వరకు తెలియదు..
తాము నిరంతరం ప్రజాసేవలో నిమగ్నమై ఉండడం వల్ల తమ ఫోన్లు ట్యాప్ అవుతున్నాయనే విషయాన్ని గమనించలేకపోయామని మాజీ మేయర్ చెప్పారు. అధికారులు స్వయంగా చెప్పేంత వరకు తమ వ్యక్తిగత సంభాషణలపై నిఘా ఉందనే విషయం తమకు తెలియదన్నారు. ఒక ప్రజాప్రతినిధిగా ఉంటూ భార్యాభర్తలిద్దరి ఫోన్లను ట్యాప్ చేయడం అత్యంత దురదృష్టకరమని ఆమె ఆవేదన వ్యక్తం చేశారు.

*మాజీ మంత్రిపైనే అనుమానాలు!
గత ప్రభుత్వంలో కీలక పదవిలో ఉన్న ఓ మహిళా నేత, మాజీ మంత్రి తమపై కక్ష్యపూరితంగా వ్యవహరించారని పారిజాత ఆరోపించారు. మహేశ్వరం నియోజకవర్గంలో తాము ఆమెకు గట్టి పోటీగా మారుతామనే భయంతోనే.. దగ్గరుండి మరీ తమ ఫోన్లను ట్యాపింగ్ చేయించారనే బలమైన అనుమానం తమకు ఉందన్నారు.
ఎన్నికల సమయంలో తమ కదలికలపై నిరంతరం నిఘా పెట్టేవారని, తాము చేపట్టే ప్రతి కార్యక్రమానికి అడుగడుగునా అడ్డుతగిలేవారని గుర్తుచేశారు. తమ రాజకీయ వ్యూహాలను ముందే పసిగట్టి, తమతో కలిసి పనిచేయాలనుకున్న స్థానిక నాయకులను, కార్యకర్తలను తీవ్ర భయాందోళనలకు గురిచేశారని ఆమె ధ్వజమెత్తారు.