రంగారెడ్డి:

దేశ చరిత్రలోనే అత్యంత ప్రతిష్టాత్మకంగా, అహింసాయుత మార్గంలో, ప్రజాస్వామ్య పద్ధతిలో పోరాడి సాధించుకున్న తెలంగాణ రాష్ట్రం నేడు దేశంలోనే సుస్థిరమైన స్థానాన్ని సంపాదించుకుందని రంగారెడ్డి జిల్లా గ్రంథాలయ సంస్థ పూర్వ అధ్యక్షుడు, తెలంగాణ రాష్ట్ర సమితి జిల్లా అధ్యక్షుడు కప్పాటి పాండురంగారెడ్డి అన్నారు. తెలంగాణ రాష్ట్ర 12వ ఆవిర్భావ దినోత్సవ వేడుకలను అత్యంత వైభవంగా జరుపుకుంటున్న తరుణంలో, మంగళవారం ఆయన ఒక ప్రకటన విడుదల చేశారు. స్వరాష్ట్ర సాధన కోసం పోరాడిన ఒక ఉద్యమకారుడిగా ఈ వేడుకల్లో భాగస్వామిని కావడం తనకు ఎంతో గర్వంగా ఉందంటూ ఆయన ఆనందం వ్యక్తం చేశారు.

*ఉద్యమ ప్రస్థానంలో భాగస్వామ్యం గొప్ప అనుభూతి
2001 ఏప్రిల్ 27న ఊపిరి పోసుకున్న తెలంగాణ రాష్ట్ర సమితి ద్వారా మలిదశ ఉద్యమంలో చురుగ్గా పాల్గొనే అవకాశం తనకు దక్కిందని పాండురంగారెడ్డి గుర్తుచేసుకున్నారు. కందుకూరు మండల మొట్టమొదటి పార్టీ కన్వీనర్‌గా, మండల అధ్యక్షుడిగా, జిల్లా కార్యవర్గ సభ్యుడిగా, జిల్లా ప్రధాన కార్యదర్శిగా, మహేశ్వరం నియోజకవర్గ బాధ్యుడిగా, రాజకీయ ఐక్య కార్యాచరణ సమితి అధికార ప్రతినిధిగా, రాష్ట్ర కార్యవర్గ సభ్యుడిగా ఉద్యమ నాయకత్వంతో కలిసి నడిచే అరుదైన అవకాశం తనకు లభించిందని పేర్కొన్నారు.

ఎందరో అమరవీరుల ఆత్మబలిదానాలు, ఉద్యమకారుల నిరంతర పోరాటాలు, అన్ని వర్గాల ప్రజల క్రియాశీలక భాగస్వామ్యం, రాజకీయ ఐక్య కార్యాచరణ సమితి తోడ్పాటుతో తెలంగాణ ప్రజల దశాబ్దాల కల 2014 జూన్ 2న సాకారమైందని ఆయన వివరించారు.