( స్పెషల్ కరస్పాండెంట్, హైదరాబాద్ )

వైద్యం ఒక మహత్తర కార్యక్రమం.. వైద్యులు భగవంతుడితో సమానం.. వైద్యశాఖ అనేది ఒక ప్రత్యేకతను సంతరించుకున్న శాఖ.. ఆ బ్రహ్మ ప్రాణం పోసి జన్మను ఇస్తే..  వైద్యులు మరు జన్మను ఇస్తారు.. వైద్యో నారాయణో హరి అనే నానుడి ఇప్పుడు బూజుపట్టిపోయింది.. ప్రభుత్వ వైద్యానికి గ్రహణం పట్టింది.. చికిత్సకు వీలుకాని రోగం చుట్టుకుంది.. అవినీతి, లంచగొండితనం అనే వైరస్ వైద్య శాఖకు అంటుకుంది..  దీంతో ప్రజారోగ్యం అటకెక్కేసింది.. సామాన్య, పేద ప్రజల ప్రాణాలకు గ్యారెంటీ లేకుండా పోయింది.. ఈ వరస మారాలని పోరాటం చేస్తోంది ఫోరం ఫర్ యాంటీ కరప్షన్ అండ్  హ్యూమన్ రైట్స్ సంస్థ ".. 

దేవుడితో సమానం అన్న వైద్యుడు… విలువలు కోల్పోతున్న దుర్భర పరిస్థితి ఇప్పుడు రాజ్యం ఏలుతోంది.. ఒకప్పుడు ప్రభుత్వ వైద్యుడు అంటే పేదల పాలిట దేవుడు. ఉచిత వైద్యం, నిజాయితీ సేవ, మానవత్వం.. ఇవే ప్రభుత్వ ఆసుపత్రుల గుర్తింపు. కానీ నేడు అదే వ్యవస్థలో వైద్యుల కొరత, నర్సులపై అధిక భారం, పరికరాల లేమి, మందుల కొరత, మౌలిక వసతులు శిథిలావస్థకు చేరుకున్నాయి.. దీంతో వైద్యో నారాయణో హరి అన్న మాటను వ్యంగ్యంగా మారుస్తున్నాయి.

ఇది అభివృద్ధి కాదు… ప్రజల ప్రాణాలతో ఆట : 

పథకాలు పోస్టర్లలో… బాధలు వార్డుల్లో మిగిలిపోతున్నాయి.. ప్రభుత్వం గొప్పగా ప్రకటించే ఆరోగ్య పథకాలు కాగితాల్లో మాత్రమే కనిపిస్తున్నాయి. గ్రౌండ్ లెవెల్‌లో మాత్రం దుర్భర పరిస్థితులు కనిపిస్తున్నాయి..  ఆరోగ్యశ్రీ కార్డుతోనూ బయట ఖర్చులు తప్పడం లేదు.. 
ప్రభుత్వ ఆసుపత్రిలో బెడ్ దొరకక ప్రైవేట్ వైద్యం కోసం పరుగులు పెట్టాల్సి వస్తోంది.. పేద కుటుంబాలు అప్పుల పాలవుతున్నాయి.. 

ఇదేనా సంక్షేమ రాజ్యం? :

ఇది పూర్తిగా వైద్యుల తప్పు అని చెప్పలేము.. అసలు వ్యవస్థకే పెద్ద రోగం వచ్చింది.. ఇక్కడ బాధ్యత అంతా వైద్యులపై వేయడం కూడా అన్యాయం. ఒక డాక్టర్‌పై వందల మంది రోగులు ఆధారపడుతున్నారు..  24 గంటల డ్యూటీలు, వారికి సరైన భద్రత లేకపోవడం, రాజకీయ జోక్యం, అధికారుల నిర్లక్ష్యం, అవినీతి, ఇవన్నీ కలసి వైద్యుడినే ఒక బాధితుడిగా మార్చుతున్నాయి.

ప్రాణాల విలువ శూన్యం? :

ఆక్సిజన్ లేక పెరుగుతున్న మృతులు.. ప్రసవ సమయంలో తల్లి, శిశు మరణాలు, ఎమర్జెన్సీలో అంబులెన్స్ ఆలస్యం కావడం.. 
ఇవి వార్తలుగా మాత్రమే మిగులుతున్నాయి. మరి దీనికి బాధ్యులెవరు? జవాబుదారీతనం ఎక్కడ? ఇకనైనా ప్రభుత్వం మేల్కొనకపోతే… ప్రజలే మేల్కొంటారు.. నిజానికి వైద్యం వ్యాపారం కాదు అది మౌలిక హక్కు. ప్రభుత్వం ఇప్పటికైనా వైద్య నియామకాలు పూర్తి చేయాలి.. 
ఆసుపత్రులకు నిధులు నిజంగా చేరేలా చూడాలి.. అవినీతిపై కఠిన చర్యలు తీసుకోవాలి.. ప్రాథమిక ఆరోగ్య కేంద్రాలను బలోపేతం చేయాలి..  లేకపోతే “వైద్యో నారాయణో హరి” అన్న మాట చరిత్ర పుస్తకాల్లో మాత్రమే మిగిలిపోయే నానుడిగా మారిపోతుంది. ప్రజల ప్రాణాలే లక్ష్యమా? లేదా గణాంకాలు, ప్రచారమే ప్రభుత్వ వైద్యానికి పరమార్థమా? ఒక్కసారి ఆలోచించాలి..