హైదరాబాద్: 

పేదవాడి గుండె చప్పుడు ఆగిపోవద్దని, ప్రాణాపాయంలో ఉన్నవారిని కార్పొరేట్ వైద్యం దరిచేర్చాలని నిరంతరం తపించే ‘ఆరోగ్య మిత్ర’ల గుండె ఇవాళ భారమై ఆగిపోతోంది. రోగులకు భరోసా ఇచ్చే ఆ చేతులే.. ఆకలి కేకలు తాళలేక, అప్పుల బాధ భరించలేక ఉరితాడును వెతుక్కుంటున్నాయి. ప్రభుత్వ ఆసుపత్రుల్లో వైద్యుడికి, రోగికి మధ్య వారధిగా ఉంటూ లక్షలాది మందికి పునర్జన్మ నిస్తున్న ఈ క్షేత్రస్థాయి యోధుల జీవితాలు ఇవాళ దిక్కులేనివయ్యాయి. 

చాలీచాలని వేతనాలు, అవి కూడా నెలల తరబడి పెండింగ్‌లో పడటంతో.. కన్నబిడ్డల ఆకలి తీర్చలేక వారం వ్యవధిలో ఇద్దరు ఉద్యోగులు తనువు చాలించడం రాష్ట్రవ్యాప్తంగా కలకలం రేపుతోంది.

​హన్మకొండ జిల్లా మేడికవర్‌ ఆసుపత్రిలో పనిచేస్తున్న శ్రీనివాస్‌ సోమవారం బలవన్మరణానికి పాల్పడ్డారు. 2007 నుంచి అంటే సుమారు 17 ఏళ్లుగా ఆరోగ్యశ్రీ సేవల్లోనే ఉన్న ఆయన, పెరిగిన ధరల భారానికి తోడు, జీతాలు సకాలంలో అందకపోవడంతో తీవ్ర మనస్తాపానికి గురయ్యారు. వారం రోజుల క్రితమే సంగారెడ్డి జిల్లా జోగిపేటలో రవీందర్‌ అనే మరో ఆరోగ్య మిత్ర ఆత్మహత్య చేసుకున్న ఘటన మరవకముందే.. ఇప్పుడు శ్రీనివాస్‌ బలి కావడం వ్యవస్థలోని వైఫల్యానికి పరాకాష్ట.
​మధ్యవర్తుల ‘దోపిడీ’ మేత.. ఉద్యోగుల బతుకు ఈత!
​ఆరోగ్య మిత్రల జీవితాలు అడకత్తెరలో పోకచెక్కలా మారాయి. అటు సర్కారు ఉదాసీనత, ఇటు అవుట్‌సోర్సింగ్‌ ఏజెన్సీల దౌర్జన్యం వీరిని నిలువునా ముంచుతున్నాయి.
​పీఎఫ్‌, ఈఎస్‌ఐ గోల్‌మాల్‌: ఉద్యోగుల వేతనాల నుంచి కోత విధిస్తున్న పీఎఫ్‌, ఈఎస్‌ఐ నిధులు వారి ఖాతాల్లో జమ కావడం లేదని క్షేత్రస్థాయిలో గుసగుసలు వినిపిస్తున్నాయి.

అవుట్‌సోర్సింగ్‌ వ్యవస్థను రద్దు చేసి, నేరుగా ప్రభుత్వమే వేతనాలు చెల్లిస్తుందని గద్దెనెక్కిన వారు ఇచ్చిన హామీలు ఇప్పటికీ అమలుకు నోచుకోలేదు. ఫలితంగా మధ్యవర్తులు బాగుపడుతుంటే, కష్టజీవులు బలిపశువులవుతున్నారు.
​సర్కారు కళ్లు తెరవాలి: గిరి యాదయ్య..
​శ్రీనివాస్‌ కుటుంబాన్ని పరామర్శించిన ఆరోగ్యశ్రీ ఎంప్లాయిస్‌ యూనియన్‌ రాష్ట్ర అధ్యక్షుడు గిరి యాదయ్య సర్కారు తీరుపై నిరసన వ్యక్తం చేశారు. "వందలాది కుటుంబాలను ఆదుకుంటున్న ఆరోగ్య మిత్రలు ఇవాళ రోడ్డున పడ్డారు. వారం వ్యవధిలో ఇద్దరు ఆత్మహత్య చేసుకోవడం ప్రభుత్వానికే సిగ్గుచేటు. తక్షణమే మృతుల కుటుంబాలను ఆదుకోవాలి. కనీస వేతనం రూ. 21,000 కు పెంచి, ఏజెన్సీల అక్రమాలకు అడ్డుకట్ట వేయాలి" అని డిమాండ్‌ చేశారు. యూనియన్‌ తరపున బాధితులకు రూ. 10,000 తక్షణ ఆర్థిక సాయం అందజేశారు.​ఈ కార్యక్రమంలో రాష్ట్ర ప్రధాన కార్యదర్శి కుమార్, ఉపాధ్యక్షులు సుమన్, రవీందర్, రాజు, రత్నం, నాగరాజుతో పాటు ఉమ్మడి వరంగల్ జిల్లాల ప్రతినిధులు పాల్గొన్నారు. "ప్రాణాలు పోయాక ఇచ్చే పరామర్శ కంటే.. ప్రాణం ఉండగానే ఇచ్చే భరోసా మిన్న" అని వారు ప్రభుత్వానికి విజ్ఞప్తి చేస్తున్నారు.