వన్‌టైమ్ పర్మిషన్ అన్నారు.. వందసార్లు తిప్పుతున్నారు!
ఏఐ అంటే పారదర్శకత అనుకుంటే.. అది అధికారుల జేబుల 'ఏటీఎం' అయింది!
షార్ట్‌ఫాల్ పేరుతో బ్లాక్‌మెయిల్.. కమీషన్ ఇస్తేనే సాఫ్ట్‌వేర్‌కు 'కన్ను' తెరుచుకుంటోంది!
నియమాలు సామాన్యుడికి ఉచ్చు.. ఏజెంట్లకు మాత్రం కాసుల మెచ్చు!
నిర్మాణ రంగం కుదేలవుతున్నా.. పాలకుల నిమ్మకు నీరెత్తిన తీరు వెర్రి తలలు వేస్తోంది!
టెక్నాలజీ సాక్షిగా సాగుతున్న ఈ 'దోపిడీ'కి అడ్డుకట్ట పడేదెప్పుడు?

(పరిశోధనాత్మక పాత్రికేయులు ఎం.వేణుగోపాల్ "వీ.జీ" )

​( హైదరాబాద్ - భారత శక్తి):

​షార్ట్‌ఫాల్.. అధికారుల 'షార్ట్‌కట్' సంపాదన!

అన్నీ సరిచేసినా, ఆఫీసర్‌కు ఫోన్ కలవకపోయినా.. వెంటనే 'రిజెక్ట్' కొడుతున్నారు.

​ఏజెంట్ల రాజ్యం: ఆఫీసు చుట్టూ తిరిగితే పనికాదు కానీ, బయట తిరిగే ఏజెంట్ల ద్వారా 'రేటు' కుదుర్చుకుంటే మాత్రం గంటల్లోనే గ్రీన్ సిగ్నల్ వస్తోంది.

​ఆక్యుపెన్సీ సర్టిఫికెట్ (OC).. బిల్డర్లకు యమపాశం!

​నిర్మాణం పూర్తయ్యాక ఇచ్చే OC కోసం బిల్డర్లు నరకం చూస్తున్నారు. ప్లాన్ ప్రకారం కట్టినా సరే, టేపు పట్టుకొచ్చి 'ఇంచీ' తేడా ఉందంటూ లక్షల్లో డిమాండ్ చేస్తున్నారు.
​"మేము తప్పు చేస్తే బ్లాక్‌మెయిల్ చేస్తున్నారు సరే.. కానీ అంతా కరెక్ట్‌గా ఉన్నా సాఫ్ట్‌వేర్ లోపం అని సాకులు చెప్పి ఎందుకు ఆపుతున్నారు? బ్యాంక్ వడ్డీలు కట్టలేక మేం చావాలా?" అని మధ్యతరగతి బిల్డర్లు కన్నీరు పెడుతున్నారు.

​అడిగితే 'బ్లాక్‌మెయిల్' రివర్స్ అటాక్!

​DTCP, HMDA కార్యాలయాల్లోని సపోర్టింగ్ టీమ్ లేదా అధికారులను నిలదీస్తే.. "మీరేదో తప్పు చేశారు అందుకే భయపడుతున్నారు" అంటూ రివర్స్ బ్లాక్‌మెయిల్‌కు దిగుతున్నారు. అధికారులు తెలిసి తప్పు చేస్తూ, అడిగితే టెక్నాలజీ మీద నెట్టేయడం వీరికి పరిపాటిగా మారింది. 2025లో ఏసీబీ ఎన్ని దాడులు చేసినా, బినామీల ద్వారా వందల కోట్లు వెనకేస్తున్న అధికారుల తీరులో మాత్రం మార్పు రావడం లేదు.

సర్కారు ఏం చేయాలి? (భారత శక్తి సూచనలు)

​ట్రాకింగ్ సిస్టమ్: ఫైల్ ఏ టేబుల్ మీద, ఏ టైమ్‌లో ఉందో అప్లికెంట్‌కు లైవ్ ట్రాకింగ్ ఇవ్వాలి.
​అనవసర రిజెక్షన్లపై ఆడిట్: థర్డ్ పార్టీ సంస్థతో అసలు రిజెక్షన్లకు కారణాలేంటో విచారణ జరపాలి.

​ఆఫీసర్లకు పెనాల్టీ: కారణం లేకుండా ఫైల్ ఆపితే, ఆ అధికారి జీతం నుండే బిల్డర్ కట్టే వడ్డీ పెనాల్టీగా వసూలు చేయాలి.

​ఏజెంట్ల ఏరివేత: కార్యాలయాల్లో ప్రైవేట్ వ్యక్తుల జోక్యాన్ని పూర్తిగా నిషేధించాలి.

​తెలంగాణ రియల్ ఎస్టేట్ రంగం కుప్పకూలక ముందే ప్రభుత్వం కళ్ళు తెరవాలి. 'బిల్డ్ నౌ'ను నిజమైన పారదర్శక వ్యవస్థగా మార్చకపోతే, ఇది పాలనా సంస్కరణ కాదు.. కేవలం 'అవినీతి ఆధునికీకరణ'గానే మిగిలిపోతుంది.
బిల్ నౌ లో జరుగుతున్న అవినీతి అక్రమాలు ఒక్కొక్కటిగా మీ ముందుకు తదుపరి కథనంలో...