హస్తినాపురం అభివృద్ధికి రూ. 9.80 కోట్లు..

పలు అభివృద్ధి పనులకు శంకుస్థాపన చేసిన కార్పొరేటర్ బానోతు సుజాత నాయక్

On 10 Feb 2026 10:50:21

హస్తినాపురం:

హస్తినాపురం డివిజన్ ముఖచిత్రాన్ని మార్చే విధంగా మునుపెన్నడూ లేని రీతిలో భారీ నిధులతో అభివృద్ధి పనులు చేపడుతున్నట్లు జీహెచ్‌ఎంసీ స్టాండింగ్ కమిటీ సభ్యురాలు, స్థానిక కార్పొరేటర్ బానోతు సుజాత నాయక్ తెలిపారు. సోమవారం డివిజన్ పరిధిలోని పలు కాలనీల్లో రూ. 9.80 కోట్ల వ్యయంతో చేపట్టనున్న సి.సి. రోడ్లు, బి.టి. రోడ్లు, డ్రైనేజీ వ్యవస్థ మరియు పార్కుల అభివృద్ధి పనులకు ఆమె స్థానిక నాయకులతో కలిసి శంకుస్థాపన చేశారు.

నిధుల కేటాయింపు వివరాలు:

డివిజన్ వ్యాప్తంగా మౌలిక వసతుల మెరుగుదలకు కేటాయించిన నిధుల వివరాలను ఆమె ఈ సందర్భంగా వెల్లడించారు:
రూ. 5.5 కోట్లు: టీకేఆర్ కాలేజీ రోడ్డు నుండి సాగర్ ఎంక్లేవ్ వరకు, షిరిడి సాయి కాలనీ జెడ్పీ రోడ్డు నుంచి సాగర్ రోడ్డు వరకు అభివృద్ధి పనులతో పాటు హస్తినాపురం సౌత్ కాలనీలో ఫుట్‌పాత్ నిర్మాణం.
రూ. 3 కోట్లు: విశ్వేశ్వరయ్య ఇంజనీరింగ్ కాలనీలో సి.సి. రోడ్ల నిర్మాణం.
రూ. 90 లక్షలు: నార్త్ ఎక్స్టెన్షన్ కాలనీలో సి.సి. రోడ్డు మరియు కమ్యూనిటీ హాల్ చుట్టూ ప్రహరీ గోడ నిర్మాణం.
రూ. 30 లక్షలు: సాగర్ ఎంక్లేవ్‌లో సి.సి. రోడ్లు మరియు పార్కు అభివృద్ధి పనులు.

త్వరితగతిన పనులు పూర్తి చేయాలి:

ముఖ్యమంత్రి రేవంత్ రెడ్డి నాయకత్వంలోని ప్రజా ప్రభుత్వం హయాంలో గత రెండేళ్లుగా నిధుల వరద పారుతోందని, కొత్తగా ఏర్పడిన కాలనీల్లోనూ మౌలిక సదుపాయాలకు పెద్దపీట వేస్తున్నామని సుజాత నాయక్ పేర్కొన్నారు. పనుల్లో నాణ్యత పాటిస్తూ, యుద్ధప్రతిపాదికన పూర్తి చేయాలని ఆమె కాంట్రాక్టర్లను, అధికారులను ఆదేశించారు.

ఈ కార్యక్రమంలో విశ్వేశ్వరయ్య ఇంజనీర్స్ కాలనీ అధ్యక్షుడు మంకాల శేఖర్ రెడ్డి, వందనపురి కాలనీ గౌరవ అధ్యక్షుడు చండీశ్వర్, నాయకులు అమర్నాథ్ యాదవ్, నల్లవెల్లి మనోహర్ రెడ్డి, రాములు నాయక్, మైపాల్ రెడ్డి, సత్యం చారి, శ్రీనివాస్ రెడ్డి, చంద్రశేఖర్ యాదవ్, గోపిరెడ్డి చంద్రశేఖర్ రెడ్డి, నరసింహ, సతీష్ గౌడ్ తదితరులు పాల్గొన్నారు.