హైదరాబాద్‌ : 

నగర పౌరులు తమ ఇళ్లలో పేరుకుపోయిన ఎలక్ట్రానిక్ వ్యర్థాలను (ఈ-వేస్ట్) బాధ్యతగా జీ.హెచ్‌.ఎం.సీ సిబ్బందికి అప్పగించాలని కమిషనర్ ఆర్.వి. కర్ణన్ విజ్ఞప్తి చేశారు. సోమవారం ముషీరాబాద్ సర్కిల్ పరిధిలోని బాగ్‌లింగంపల్లిలో ఏర్పాటు చేసిన 'మెగా ఈ-వేస్ట్ సేకరణ డ్రైవ్'ను ఆయన స్వయంగా సందర్శించి, క్షేత్రస్థాయి ఏర్పాట్లను సమీక్షించారు.
​నేటితో ముగియనున్న డ్రైవ్
​నగరవ్యాప్తంగా సాగుతున్న ఈ ప్రత్యేక డ్రైవ్ మంగళవారంతో ముగియనుంది. ఈ సందర్భంగా ఎలక్ట్రానిక్ వ్యర్థాల సేకరణ కోసం ఏర్పాటు చేసిన ప్రత్యేక కౌంటర్లు, వాహనాల పనితీరును కమిషనర్ పరిశీలించారు. పాత సెల్ ఫోన్లు, వైర్లు, కంప్యూటర్ విడిభాగాలు, పాడైపోయిన టీవీలు వంటి వస్తువులను ఇష్టారీతిన పారవేయకుండా, శాస్త్రీయంగా నిర్వీర్యం చేసేందుకు వీలుగా మున్సిపల్ యంత్రాంగానికి సహకరించాలని ఆయన కోరారు.
​అశాస్త్రీయ పద్ధతులతో ముప్పు
​"వాడేసిన ఎలక్ట్రానిక్ పరికరాలను సాధారణ చెత్తతో కలిపి పారవేయడం వల్ల పర్యావరణానికి తీవ్ర నష్టం వాటిల్లుతుంది. ఇది భూగర్భ జలాల కాలుష్యానికే కాకుండా, ప్రజారోగ్యానికి కూడా పెను ముప్పుగా మారుతుంది" అని కమిషనర్ హెచ్చరించారు. ఈ ముప్పును నివారించేందుకే ప్రజల భాగస్వామ్యంతో ఈ భారీ సేకరణ కార్యక్రమాన్ని చేపట్టామని ఆయన స్పష్టం చేశారు.

​ఐటీ కారిడార్‌పై ప్రత్యేక దృష్టి
​ఈ డ్రైవ్‌లో భాగంగా ఐటీ కార్యాలయాలు ఎక్కువగా ఉన్న ప్రాంతాలు, ఎలక్ట్రానిక్ విడిభాగాల విక్రయ కేంద్రాలపై జీహెచ్‌ఎంసీ ప్రత్యేక నిఘా పెట్టింది.

​లక్ష్యం: రేపటిలోగా గరిష్ట స్థాయిలో ఈ-వేస్ట్‌ను సేకరించి, సురక్షితంగా రీసైక్లింగ్ కేంద్రాలకు తరలించడమే లక్ష్యంగా పెట్టుకున్నారు.