హైదరాబాద్: 
కాచిగూడ పరిధిలో అదృశ్యమై, సింగరాయకొండలో ప్రాణాలు కోల్పోయిన విద్యార్థి అంకం రాహుల్ ఉదంతం రాష్ట్రంలో కలకలం రేపుతోంది. కొడుకు మరణించి 20 రోజులు గడుస్తున్నా.. కనీసం ఆ విద్యార్థి భౌతికకాయాన్ని కూడా తల్లిదండ్రులకు అప్పగించకపోవడంపై తీవ్ర నిరసన వ్యక్తమవుతోంది. తమ కళ్లముందే తిరగాల్సిన బిడ్డ శవమై ఎక్కడో పడి ఉంటే, ఆ దేహాన్ని కూడా చూడనివ్వని ప్రభుత్వాల, పోలీసుల నిర్లక్ష్య వైఖరిని నిరసిస్తూ బాధితులు కన్నీటి దీక్షకు దిగారు. బాగ్ లింగంపల్లిలోని బీసీ రాజ్యాధికార సమితి కార్యాలయంలో బుధవారం ఈ నిరసన కార్యక్రమం ప్రారంభమైంది. ఈ దీక్షకు బీసీ రాజ్యాధికార సమితి వ్యవస్థాపక అధ్యక్షుడు దాసు సురేష్ అధ్యక్షత వహించి, ప్రభుత్వంపై తీవ్రస్థాయిలో ఆగ్రహం వ్యక్తం చేశారు.

*కార్పొరేట్ విద్యా సంస్థల తీరు మారాలి: అల్లంపల్లి రామకోటి హెచ్చరిక
ఈ నిరసన కార్యక్రమంలో పాల్గొన్న తెలంగాణ బీసీ సంక్షేమ సంఘం రాష్ట్ర అధ్యక్షుడు అల్లంపల్లి రామకోటి విద్యా వ్యవస్థలోని లోపాలను తీవ్రంగా తప్పుపట్టారు. రాహుల్ మరణాన్ని ప్రస్తావిస్తూ కార్పొరేట్ సాంకేతిక విద్యా సంస్థల (బి.టెక్ కాలేజీల) యాజమాన్యాలు ఇప్పటికైనా కళ్లు తెరవాలని హితవు పలికారు. విద్యార్థులపై మానసిక ఒత్తిడి, వేధింపులు ఆపి, తక్షణమే తమ ధోరణిని మార్చుకోవాలని డిమాండ్ చేశారు.

 "విద్యార్థులపై జరుగుతున్న వేధింపుల గురించి ఫిర్యాదు అందిన వెంటనే అధికార యంత్రాంగం స్పందించాలి. నిర్లక్ష్యం వహిస్తే, భవిష్యత్తులో జరిగే ప్రతి ఘాతుకానికి విద్యా సంస్థల యాజమాన్యాలతో పాటు ప్రభుత్వమే పూర్తి బాధ్యత వహించాల్సి ఉంటుంది."
       *అల్లంపల్లి రామకోటి

*ఇది ప్రజాస్వామ్యమా? ధనాస్వామ్యమా?
ఈ సందర్భంగా ప్రజా సంఘాల నాయకులు పాలకుల తీరును ప్రశ్నిస్తూ పలు అంశాలను లేవనెత్తారు:

 *తల్లిదండ్రులకు హెచ్చరిక:రాష్ట్రంలోని పల్లెలు, పట్టణాలలోని విద్యార్థుల తల్లిదండ్రులు తమ పిల్లల రక్షణ పట్ల అప్రమత్తంగా ఉండాలి. వ్యాపార ధోరణితో నడుస్తున్న విద్యా సంస్థలలో విద్యార్థుల ప్రాణాలకు రక్షణ కరువైందని, ప్రభుత్వాల ఉదాసీనత ఇలాగే కొనసాగితే రేపు మరే కుటుంబానికైనా ఈ దారుణ పరిస్థితి ఎదురుకావచ్చని ఆందోళన వ్యక్తం చేశారు.

 *పోరాటం ఆగదు:
బాధితులకు పూర్తి న్యాయం జరిగే వరకు తమ పోరాటం ఆగదని, అవసరమైతే రాష్ట్రవ్యాప్త ఆందోళనలు చేపడతామని నేతలు హెచ్చరించారు.
ఈ నిరసన కార్యక్రమంలో వెనుకబడిన, నలిగిపోయిన వర్గాల చైతన్య వేదిక స్థాపకురాలు బోనం ఊర్మిల, బీసీ సంక్షేమ సంఘం ముఖ్య కార్యనిర్వహణాధికారి (సీఈఓ) పోషాల సరస్వతి, టి. జ్యోతి, రాజేష్ తదితరులు పాల్గొని బాధితులకు మద్దతు ప్రకటించారు.