హైదరాబాద్:

నగరంలో వరద ముంపు సమస్యకు శాశ్వత పరిష్కారం కనుగొనేందుకు అన్ని ప్రభుత్వ విభాగాలు సమన్వయంతో, కలసికట్టుగా పనిచేయాలని ప్రభుత్వ సలహాదారు సుదర్శన్‌రెడ్డి సూచించారు. మంగళవారం ఉదయం నుంచి నగరంలోని ప్రధాన వరద ముంపు ప్రాంతాలలో ఉన్నతాధికారుల బృందం విస్తృతంగా పర్యటించింది. ఈ బృందంలో డీజీపీ సీవీ ఆనంద్, హైడ్రా కమిషనర్ ఏవీ రంగనాథ్, జీహెచ్‌ఎంసీ కమిషనర్ ఆర్వీ కర్ణన్, సీఎంసీ కమిషనర్ సృజన, సైబరాబాద్ పోలీస్ కమిషనర్ రమేష్ రెడ్డిలతో పాటు ఇరిగేషన్, మున్సిపల్, రెవెన్యూ శాఖల ఇంజనీర్లు, ఉన్నతాధికారులు పాల్గొన్నారు.

*మల్కం చెరువులో పూడిక సమస్య
అధికారుల బృందం మొదటగా రాయదుర్గంలోని మల్కం చెరువును సందర్శించి, వరదకు గల కారణాలపై సమీక్ష నిర్వహించింది. చెరువులో వరద నీటిమట్టాన్ని తగ్గిస్తే ముంపు సమస్య చాలా వరకు తప్పుతుందని అధికారులు ఈ సందర్భంగా వెల్లడించారు. చెరువు నిండా నీరు ఉండటం వల్ల ఇన్‌లెట్ల వద్ద భారీగా పూడిక పేరుకుపోయిందని, దీనివల్ల వరద నీరు ధారాళంగా లోపలికి వెళ్లే అవకాశం లేకుండా పోతోందని హైడ్రా కమిషనర్ ఏవీ రంగనాథ్ వివరించారు. అనంతరం ఖాజాగూడ చెరువు ఇన్‌లెట్ల వద్ద జరుగుతున్న పూడికతీత పనులను, నీరు సజావుగా సాగేలా కాలువ విస్తరణ పనులను బృందం పరిశీలించింది.

*మొండికుంట, జూబ్లీ గార్డెన్స్ లో పనుల పరిశీలన
కొండాపూర్ సంతోష్ దాబా సమీపంలోని వరద కాలువల్లో జరుగుతున్న పూడికతీత పనులను బృందం తనిఖీ చేసింది. మొండికుంటకు వరద నీరు సాఫీగా వెళ్లే పరిస్థితి లేకపోవడంతో.. జూబ్లీ గార్డెన్స్‌లో స్లాబులు తొలగించి హైడ్రా చేపట్టిన పూడికతీత పనులను సుదర్శన్‌రెడ్డి, ఇతర అధికారులు పరిశీలించారు.

*కఠిన చర్యలకు డీజీపీ ఆదేశం
చందానగర్‌లోని గంగారం చెరువు ఇన్‌లెట్లు పూడిపోవడం వల్ల ప్రధాన రహదారి వరద నీటిలో మునుగుతోందని స్థానిక అధికారులు బృందం దృష్టికి తెచ్చారు. రహదారిపై ఉన్న కాలువల పూడికతీత పనులను యుద్ధప్రాతిపదికన పూర్తి చేయాలని సుదర్శన్‌రెడ్డి ఆదేశించారు. క్షేత్రస్థాయిలో పనులకు ఎలాంటి ఆటంకాలు ఎదురైనా వెనకాడకుండా పోలీస్ సహకారం తీసుకోవాలని డీజీపీ సీవీ ఆనంద్ అధికారులకు సూచించారు. రహదారులపై వరద నీరు నిలిస్తే తీవ్ర ట్రాఫిక్ ఇబ్బందులు తలెత్తుతాయని, అన్ని విభాగాలు సమన్వయంతో వరద కట్టడికి చర్యలు చేపట్టాలని ఆయన పిలుపునిచ్చారు.