హైదరాబాద్:

నగరంలో పారదర్శకమైన, సమగ్రమైన మరియు లోపాలు లేని ఓటర్ల జాబితాను రూపొందించడమే లక్ష్యంగా గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) యంత్రాంగం కసరత్తును ముమ్మరం చేసింది. ఇందులో భాగంగా జీహెచ్‌ఎంసీ ప్రధాన కార్యాలయ సమావేశ మందిరంలో ఓటర్ల జాబితా 'ప్రత్యేక సమగ్ర సవరణ' (స్పెషల్ సమ్మరీ రివిజన్) ప్రక్రియపై బుధవారం ఒక ఉన్నత స్థాయి సమీక్షా సమావేశం జరిగింది. జీహెచ్‌ఎంసీ కమిషనర్ మరియు జిల్లా ఎన్నికల అధికారి ఆర్.వి. కర్ణన్ అధ్యక్షతన జరిగిన ఈ సమావేశంలో హైదరాబాద్ జిల్లా కలెక్టర్ ప్రియాంక అలా, అదనపు కమిషనర్ (ఎన్నికలు) కె. చంద్రకల పాల్గొని, గుర్తింపు పొందిన అన్ని రాజకీయ పార్టీల ప్రతినిధులతో విస్తృతంగా చర్చించారు.

*బూత్ స్థాయి అధికారులకు సహకరించాలి
ఈ సందర్భంగా జిల్లా ఎన్నికల అధికారి ఆర్.వి. కర్ణన్ మాట్లాడుతూ.. ఓటర్ల జాబితా నమోదు ప్రక్రియ గురించి రాజకీయ పార్టీలకు సమగ్రంగా వివరించారు. జాబితాలో ఎలాంటి తప్పులు దొర్లకుండా ఉండేందుకు అర్హులైన ప్రతి ఒక్కరికీ ఓటరు నమోదు పత్రాలను (ఎన్యుమరేషన్ ఫారమ్‌లు) పంపిణీ చేయనున్నట్లు స్పష్టం చేశారు. క్షేత్రస్థాయిలో సర్వే నిర్వహించే బూత్ స్థాయి అధికారులకు (బీఎల్ఓలు) రాజకీయ పార్టీలు పూర్తి సహకారం అందించాలని, వారి విధులకు ఎలాంటి ఆటంకాలు కలగకుండా చూడాలని కోరారు. నిర్ణీత గడువులోగా సరిగ్గా నింపిన దరఖాస్తు పత్రాలను ఎన్నికల విభాగానికి సమర్పించాల్సిన బాధ్యత అందరిపైనా ఉందన్నారు.