అక్షరం అంగడి సరుకై, ర్యాంకుల ఫ్యాక్టరీల్లో మన పిల్లల బాల్యం బలైపోతుంటే ఇంకా ఎంతకాలం ఈ కార్పొరేట్ ‘ఫీజుల కసాయిల’కు రక్తాన్ని ధారబోస్తారు తల్లిదండ్రులారా? ఏటా బడ్జెట్‌లో విద్యకు నామమాత్రపు చిల్లర విసురుతూ, ప్రైవేటు దోపిడీకి ఎర్రగాచేసి కార్పొరేట్ శక్తులకు ఊడిగం చేస్తున్న పాలకులకు, నిమ్మకు నీరెత్తినట్లు వ్యవహరించే విద్యాశాఖ అధికారులకు సిగ్గుచేటు! కొఠారి కమిషన్ చెప్పిన 'సమాన విద్య'ను అటకెక్కించి, 'డబ్బున్నోడికో చదువు.. లేనోడికో చదువు' అంటూ కొత్త ఆర్థిక కులాలను సృష్టిస్తున్న ఈ దౌర్భాగ్య వ్యవస్థపై మీ అక్షర శంఖారావం ఏది? విద్యా హక్కు చట్టాన్ని తుంగలో తొక్కిన ఏసీ క్లాస్‌రూమ్‌ల మాయాజాలాన్ని బద్దలు కొట్టకపోతే, మన భవిష్యత్ తరాలు అక్షర బానిసలుగా మిగిలిపోవడం ఖాయం. పాలకులారా, అధికారులారా.. మీ కళ్లు తెరిపించడానికే ఈ ‘భారత శక్తి’ మేలుకొలుపు!
(పరిశోధనాత్మక పాత్రికేయులు ఎం వేణుగోపాల్ రెడ్డి.. మీ.. వీ.జీ.)

*హైదరాబాద్ :

అనగనగా భారతదేశం అనే ఒక గొప్ప కుటుంబం. స్వాతంత్ర్యం వచ్చిన కొత్తలో చేతిలో చిల్లిగవ్వ లేక, చదువు అనే అమూల్యమైన కానుకను రాజ్యాంగం ‘ఆదేశిక సూత్రాలు’ అనే భద్రతా పెట్టెలో దాచింది. ఆర్థిక శక్తులు పుంజుకున్నాక, 2002లో 86వ సవరణ ద్వారా ‘ఆర్టికల్ 21A’ కింద అదే విద్యను ప్రాథమిక హక్కుగా మార్చి పిల్లల చేతికి ‘అధికార ముద్ర’ ఇచ్చింది. కానీ నేడు ఆ హక్కు ఎక్కడుంది? అంగడి సరుకై కార్పొరేట్ గద్దల చేతుల్లో బందీ అయింది! ముఖ్యంగా నూతనంగా ఏర్పడిన తెలంగాణ రాష్ట్రంలో, వందల ఏళ్లుగా పేరుకుపోయిన కుల వ్యవస్థ, సామాజిక అసమానతల కోరలు తెంచాల్సిన విద్యా వ్యవస్థ.. నేడు పేద, ధనిక వర్గాల మధ్య అంతరాన్ని మరింత పెంచే ‘విభజన కేంద్రం’గా మారుతోంది.

1.కొఠారి కల సాకారం కావాలి: కామన్ స్కూల్ సిస్టమే శరణ్యం!
1964-66 లోనే భారతదేశ అత్యున్నత విద్యా కమిషన్ "కొఠారి కమిషన్" ఒకే రకమైన సమాన విద్యా విధానాన్ని (Common School System) గట్టిగా సిఫార్సు చేసింది. ఒకే తరగతి గదిలో కలెక్టరు కొడుకు, ఒక సామాన్య సఫాయీ కార్మికుడి కూతురు పక్కపక్కన కూర్చుని చదివినప్పుడే కుల, వర్గ బేధాలు నశిస్తాయని కమిషన్ తేల్చి చెప్పింది.

*2.బడ్జెట్‌లో విద్యకు మొండిచేయి.. 6% కేటాయింపులు ఏవి?
కొఠారి కమిషన్ నుండి నేటి నూతన విద్యా విధానం (NEP 2020) వరకు ప్రతి ఒక్కరూ దేశ జీడీపీ (GDP) లో 6%నిధులను విద్యకే కేటాయించాలని ఘోషిస్తున్నా, పాలకులు మాత్రం 3-3.5% తోనే సరిపెడుతున్నారు. తెలంగాణ బడ్జెట్‌లో విద్యకు నిధులు వరదలా పారాలి. డిజిటల్ క్లాస్‌రూమ్‌లు, అధునాతన ల్యాబ్‌లు ప్రభుత్వ బడుల్లో ఉంటే, కార్పొరేట్ మాయాజాలం వైపు ప్రజలు ఎందుకు వెళ్తారు?

*3.సమ్మిళిత విద్యతోనే కుల నిర్మూలన!
పాఠశాల కేవలం అక్షరాలు దిద్దే చోటు కాదు, సామాజికీకరణ జరిగే పవిత్ర స్థలం. RTE చట్టం-2009 లోని సెక్షన్ 12(1)(c) ప్రకారం ప్రైవేట్ స్కూళ్లలో కూడా వెనుకబడిన, అట్టడుగు వర్గాల పిల్లలకు 25% ఉచిత సీట్లు ఇవ్వాలి. దీనివల్ల వివిధ సామాజిక వర్గాల పిల్లల మధ్య చిన్నతనం నుంచే ఆత్మీయత పెరుగుతుందని అంతర్జాతీయ ఆర్థిక అధ్యయనాలు (J-PAL రీసెర్చ్) నిరూపించాయి. తెలంగాణలో ఈ 25% కోటాను కచ్చితంగా అమలు చేయడంతో పాటు, ప్రతిష్టాత్మక గురుకులాల  నాణ్యతను మరింత పెంచాల్సి ఉంది.

*4.మాతృభాషలో బోధన.. శాస్త్రీయ దృక్పథం!
ఆధునిక న్యూరోసైన్స్ (నాడీ విజ్ఞాన) పరిశోధనల ప్రకారం, 8 సంవత్సరాల వయస్సు వచ్చేసరికి పిల్లల మెదడు 90% అభివృద్ధి చెందుతుంది. యునెస్కో (UNESCO) స్పష్టం చేసినట్లుగా ఈ వయసులో 
మాతృభాషలో విద్యనందిస్తేనే సృజనాత్మకత, విశ్లేషణాత్మక శక్తి పెరుగుతాయి. తెలంగాణ ప్రభుత్వం తెచ్చిన 'ద్వైభాషా పాఠ్యపుస్తకాల'  విధానం అభినందనీయం, కానీ దీనిని బట్టీల పద్ధతి నుండి మార్చి ప్రయోగాత్మక విద్య వైపు నడపాలి.

*5.ఉపాధ్యాయులకు శిక్షణ.. 'అసర్' నివేదికల హెచ్చరిక!
ఏటా వచ్చే 'అసర్' (ASER) నివేదికలు ప్రాథమిక తరగతుల పిల్లల్లో కనీస గణిత, పఠన నైపుణ్యాలు లోపిస్తున్నాయని నెత్తీనోరూ బాదుకుంటున్నాయి. దీనికి కారణం ఉపాధ్యాయుల లోపం కాదు, వారికి సరైన వృత్తిపరమైన శిక్షణ లేకపోవడం మరియు బోధనేతర పనుల భారం. బడులను రాజకీయాలకు, జనాభా లెక్కలకు వేదికలుగా మార్చడం ఆపాలి.

*సామాజిక విప్లవానికి తెలంగాణ దిశానిర్దేశం:
తెలంగాణ సమాజంలో గ్రామీణ-పట్టణ వ్యత్యాసాలు, కుల ఆధారిత ఆర్థిక అసమానతలు పోవాలంటే విద్యా వ్యవస్థ ఈ మూడు సూత్రాలపై నడవాలి:
 1.కేజీ టు పీజీ (KG to PG) అక్షర సత్యం: ఈ ఉచిత విద్యా విధానాన్ని కేవలం కాగితాలకే పరిమితం చేయకుండా, పూర్తిస్థాయి మౌలిక వసతులతో బలోపేతం చేయాలి.

 2.లింగ సమానత్వం : ఆడపిల్లల డ్రాపౌట్స్ తగ్గించడానికి గ్రామీణ ప్రాంతాల్లో రవాణా సౌకర్యాలు, రక్షణతో కూడిన వసతి గృహాలు పెంచాలి.

 3.డిజిటల్ డివైడ్ నిర్మూలన: తెలంగాణ ఫైబర్ గ్రిడ్ (T-Fiber) ద్వారా ప్రతి ప్రభుత్వ బడికి హై-స్పీడ్ ఇంటర్నెట్ అందించి, ఇంటర్నెట్ లేని పేదరికాన్ని దేశం నుండి తరిమికొట్టాలి.

'భారత శక్తి' డిమాండ్:
ఏ దేశమైతే విద్యను వ్యాపార వస్తువుగా కాకుండా "సార్వత్రిక ప్రజా సంక్షేమ హక్కు"  గా గుర్తించిందో, ఆ దేశాల్లో సామాజిక అసమానతలు మంచులా కరిగిపోయాయి. రాజ్యాంగం కల్పించిన విద్యా హక్కును కార్పొరేట్ చెర నుండి విడిపించి, ప్రభుత్వ విద్యా వ్యవస్థను "కామన్ స్కూల్" దిశగా నడిపించినప్పుడే అమరులు ఆకాంక్షించిన, రాజ్యాంగం నిర్దేశించిన సమసమాజ స్థాపన సాధ్యమవుతుంది. పాలకులారా.. మేల్కొనండి!