మహిళా సాధికారతకు బాటలు: సరూర్‌నగర్‌లో ఇందిరా మహిళా శక్తి ‘ఎగ్ కార్ట్‌ల’ పంపిణీ!

*పొదుపు సంఘాల మహిళలు ఆర్థిక స్వావలంబన సాధించాలి: డిప్యూటీ కమిషనర్ పిలుపు

On 18 Jun 2026 10:52:14

సరూర్‌నగర్:

మహిళలు స్వయం ఉపాధి రంగాల్లో రాణిస్తూ ఆర్థికంగా నిలదొక్కుకోవాలనే లక్ష్యంతో సరూర్‌నగర్ వృత్త (సర్కిల్) పట్టణ పేదరిక నిర్మూలనా సంస్థ (యూసీడీ) విభాగం కీలక అడుగు వేసింది. ఇందిరా మహిళా శక్తి పథకంలో భాగంగా ఏర్పాటు చేసిన మూడు గుడ్ల బండ్లను (ఎగ్ కార్ట్స్) వృత్త ఉప కమిషనర్ (డిప్యూటీ కమిషనర్) సి.హెచ్. శ్రీకాంత్ బుధవారం ప్రారంభించారు.
ఈ సందర్భంగా ఉప కమిషనర్ మాట్లాడుతూ.. మహిళా పొదుపు సంఘాల సభ్యులు ప్రభుత్వం అందిస్తున్న ఇలాంటి ప్రోత్సాహక పథకాలను అందిపుచ్చుకోవాలని సూచించారు. బ్యాంకుల ద్వారా రుణ సదుపాయాన్ని పొంది, చిన్న తరహా వ్యాపారాలను ప్రారంభించడం ద్వారా ఆర్థికాభివృద్ధి సాధించాలని ఆకాంక్షించారు.

*లబ్ధిదారులకు ఉపాధి వాహనాల అందజేత
కార్యక్రమంలో భాగంగా నియోజకవర్గ పరిధిలోని పలు పొదుపు సంఘాలకు ఈ గుడ్ల బండ్లను అందజేశారు.
* భవానీ నగర్‌కు చెందిన శ్రీ విఘ్నేశ్వర పొదుపు సంఘం,
*జీబీఆర్ ఆసుపత్రి ఎదురుగా ఉన్న ,శ్రీకృష్ణ పొదుపు సంఘం,
*శ్రీ లలితాంబికా పొదుపు సంఘం,
ఈ సంఘాల సభ్యులకు ఉప కమిషనర్ చేతుల మీదుగా వాహనాలను అందించి, వ్యాపారాలను ప్రారంభించారు.

*ఆర్థిక స్వావలంబనే ధ్యేయం
పట్టణ పేదరిక నిర్మూలనా సంస్థ ప్రాజెక్టు అధికారి విక్రాంత్ రెడ్డి మాట్లాడుతూ, మహిళా సంఘాల సభ్యులు వ్యాపార రంగంలోకి అడుగుపెట్టి, స్వయం ఉపాధితో సొంత కాళ్లపై నిలబడాలన్నారు. మహిళలు ఆర్థికంగా బలోపేతం అయినప్పుడే సమాజంలో నిజమైన సాధికారత సాధ్యమవుతుందని పేర్కొన్నారు.
ఈ కార్యక్రమంలో సంఘటిత నిర్వాహకులు (కమ్యూనిటీ ఆర్గనైజర్లు) జి. సహదేవ్, సైదులు, శోభన, వనరుల వ్యక్తులు (ఆర్‌పీలు) పరమేశ్వరి, శిల్ప, సమాఖ్య అధ్యక్షురాలు జ్యోతి, నాగలక్ష్మితో పాటు వివిధ పొదుపు సంఘాల ప్రతినిధులు, సభ్యులు పాల్గొన్నారు.