ఎల్బీనగర్:

ప్రజలు చెమటోడ్చి కట్టిన పన్నుల సొమ్ము కాంట్రాక్టర్లు, అవినీతి అధికారుల జేబుల్లోకి వెళ్తోంది. ఎల్బీనగర్ నియోజకవర్గం మల్కాజ్గిరి మున్సిపల్ కార్పొరేషన్ ఎల్బీనగర్ జోన్ భైరమాలగూడలోని సీతారాం నగర్ నుండి ఎస్‌వీ కాలనీ వరకు చేపట్టిన సీ.సీ రహదారి నిర్మాణం ఇందుకు నిలువెత్తు నిదర్శనంగా నిలుస్తోంది. నిబంధనలను తుంగలో తొక్కి, కనీస నాణ్యతా ప్రమాణాలు పాటించకుండా ఇష్టారాజ్యంగా రోడ్డు పనులు కానిచ్చేస్తున్నారు. దీనిపై కాలనీ వాసులు తీవ్ర ఆగ్రహం, ఆందోళన వ్యక్తం చేస్తున్నారు.

*నిబంధనలు గాల్లోకి.. అడ్డగోలుగా పనులు!
రోడ్డు నిర్మాణంలో కనీస సాంకేతిక ప్రమాణాలు పాటించడం లేదు. లెవల్స్ సక్రమంగా లేకపోవడం, ఎత్తుపల్లాలుగా రోడ్డు వేయడంతో రేపు వర్షం పడితే నీరు ఎటు పోవాలో తెలియని పరిస్థితి నెలకొంది. సిమెంట్, కాంక్రీట్ మిశ్రమంలో తీవ్ర అవినీతి జరిగినట్లు స్పష్టంగా కనిపిస్తోంది. పనులు నాసిరకంగా ఉన్నాయని స్థానికులు నెత్తీనోరూ బాదుకుంటున్నా.. కాంట్రాక్టర్ మాత్రం తన ఇష్టారాజ్యంగా పనులు ముగించేందుకు తహతహలాడుతున్నాడు.

*ఇకనైనా చర్యలు తీసుకుంటారా?
ప్రజాధనంతో అక్రమాలకు పాల్పడుతున్న కాంట్రాక్టర్‌పై, అతనికి అండగా నిలుస్తున్న అవినీతి అధికారులపై వెంటనే విచారణ జరపాలని స్థానికులు డిమాండ్ చేస్తున్నారు. ఉన్నతాధికారులు వెంటనే స్పందించి, ఈ రోడ్డు పనులను సాంకేతికంగా తనిఖీ చేయాలని, నాసిరకం పనులకు కారణమైన బాధ్యులపై కఠిన చర్యలు తీసుకోవాలని కాలనీ వాసులు హెచ్చరిస్తున్నారు. లేనిపక్షంలో ప్రజాపోరాటం తప్పదని స్పష్టం చేస్తున్నారు.