బి.ఎన్. రెడ్డి నగర్: 

"ఒకే లక్ష్యం.. ఒకే ఆలోచన.. అదే మీ జీవితం కావాలి" అన్న స్వామి వివేకానందుని పిలుపు నేటి యువతకు స్ఫూర్తిదాయకమని బి.ఎన్. రెడ్డి నగర్ డివిజన్ కార్పొరేటర్ మొద్దు లచ్చి రెడ్డి అన్నారు. స్వామి వివేకానంద జయంతి (జాతీయ యువజన దినోత్సవం) పురస్కరించుకొని సోమవారం NGO’S కాలనీలోని వివేకానంద విగ్రహం వద్ద 'వివేకానంద క్రాంతి సంఘ్' ఆధ్వర్యంలో 'యువత కోసం పరుగు - దేశం కోసం పరుగు' పేరిట 3K రన్ నిర్వహించారు.
​ఈ కార్యక్రమానికి బిజెపి యువ మోర్చా రాష్ట్ర అధ్యక్షులు కుండే గణేష్, రంగారెడ్డి అర్బన్ జిల్లా అధ్యక్షులు వనపల్లి శ్రీనివాస్ రెడ్డి, డివిజన్ అధ్యక్షులు విష్ణువర్ధన్ రావులతో కలిసి కార్పొరేటర్ వివేకానందుని విగ్రహానికి పూలమాలలు వేసి ఘనంగా నివాళులర్పించారు. అనంతరం జెండా ఊపి పరుగును ప్రారంభించారు.
​ప్రపంచ యవనికపై భారత కీర్తిని చాటిన మహనీయుడు
​ఈ సందర్భంగా కార్పొరేటర్ లచ్చి రెడ్డి మాట్లాడుతూ.. భారతదేశ ఆధ్యాత్మిక సంపదను, సంస్కృతిని ప్రపంచ దేశాలకు చాటిచెప్పిన గొప్ప తత్వవేత్త వివేకానందుడని కొనియాడారు. చికాగో ప్రసంగం ద్వారా భారతీయుల మేధాశక్తిని ప్రపంచానికి పరిచయం చేశారని, ఆయన ఒక కేవలం సాధువు మాత్రమే కాక, గొప్ప మానవతావాది అని పేర్కొన్నారు.
​ఉక్కు నరాలు.. ఇనుప కండరాలు కావాలి

​"యువతపై వివేకానందుడికి అపారమైన నమ్మకం ఉండేది. దేశ భవిష్యత్తును మార్చగలిగే శక్తి యువతకే ఉందని ఆయన విశ్వసించేవారు. 'ఇనుప కండరాలు, ఉక్కు నరాలు, పిడుగు వంటి మనస్సు' కలిగిన యువత దేశానికి అవసరమని ఆయన ఇచ్చిన సందేశం నేటికీ అక్షర సత్యం" అని లచ్చి రెడ్డి ఉద్ఘాటించారు. యువత చెడు మార్గాల వైపు వెళ్లకుండా, ఆధ్యాత్మిక బలంతో, క్రమశిక్షణతో దేశ నిర్మాణంలో భాగస్వాములు కావాలని పిలుపునిచ్చారు.

​ముఖ్య ఉద్దేశ్యం: యువతలో శారీరక దృఢత్వం, దేశభక్తిని పెంపొందించడం, 3K రన్‌లో పెద్ద సంఖ్యలో యువకులు, విద్యార్థులు ఉత్సాహంగా పాల్గొన్నారు.