జనగణనలో తప్పులు ఉండొద్దు

On 15 May 2026 10:16:45

ప్రతి ఇంటి సమాచారం పక్కాగా నమోదు చేయాలి
కందుకూరులో ఇంటింటి సర్వేను పరిశీలించిన రంగారెడ్డి కలెక్టర్ నారాయణ రెడ్డి

కందుకూరు:

జనగణన – 2027లో భాగంగా చేపట్టిన ఇంటింటి సర్వే ప్రక్రియలో ఎలాంటి పొరపాట్లు జరగకుండా జాగ్రత్త వహించాలని రంగారెడ్డి జిల్లా కలెక్టర్ సి.నారాయణ రెడ్డి అధికారులను ఆదేశించారు. గురువారం కందుకూరు మండలంలో కొనసాగుతున్న గృహ గణన సర్వేను ఆయన స్వయంగా పరిశీలించారు. ఎన్యుమరేటర్లు నమోదు చేస్తున్న వివరాలను అడిగి తెలుసుకుని, క్షేత్రస్థాయి సిబ్బందికి పలు సూచనలు చేశారు.

నిబంధనల మేరకే డేటా సేకరణ
సర్వే సందర్భంగా డేటా సేకరణ, వివరాల నమోదు ప్రక్రియను పరిశీలించిన కలెక్టర్.. ఎన్యుమరేటర్లు ప్రభుత్వం జారీ చేసిన మార్గదర్శకాలను ఖచ్చితంగా పాటించాలని స్పష్టం చేశారు. "ఎన్యుమరేటర్లకు కేటాయించిన బ్లాక్ పరిధిలో ప్రతి ఇంటికి వెళ్లాలి. ఏ ఒక్క కుటుంబాన్ని వదలకుండా పూర్తిస్థాయిలో వివరాలు సేకరించాలి" అని ఆదేశించారు. సర్వేలో సేకరించిన సమాచారాన్ని ఎప్పటికప్పుడు డిజిటలైజ్ చేయాలని, ఆన్లైన్ ఎంట్రీలలో జాప్యం ఉండకూడదని సూచించారు.

ప్రజలకు అవగాహన కల్పించాలి
ఫీల్డ్ స్థాయిలో పనిచేసే సిబ్బంది ప్రజలతో మర్యాదగా ఉంటూ, జనగణన యొక్క ప్రాధాన్యతను వారికి వివరించాలని కలెక్టర్ పేర్కొన్నారు. ప్రజల సహకారం పొంది సమాచారాన్ని పారదర్శకంగా సేకరించాలన్నారు. అధికారులు నిరంతరం పర్యవేక్షణ చేస్తూ నిర్దేశిత గడువులోపు సర్వే పూర్తి చేయాలని ఆదేశించారు.

క్షేత్రస్థాయిలో పరిశీలన
మండలంలోని ఒక ఇంటి వద్ద ఎన్యుమరేటర్లు వివరాలు నమోదు చేస్తున్న తీరును కలెక్టర్ దగ్గరుండి గమనించారు. ఈ కార్యక్రమంలో కందుకూరు ఆర్డీఓ జగదీశ్వర్ రెడ్డి, తహశీల్దార్, ఎంపీడీఓతో పాటు సంబంధిత శాఖల అధికారులు, ప్రజాప్రతినిధులు పాల్గొన్నారు.