హైదరాబాద్:

అమెరికా-ఇరాన్ యుద్ధ పరిస్థితుల నేపథ్యంలో దేశ ప్రయోజనాలను దృష్టిలో ఉంచుకుని ప్రతి ఒక్కరూ ఇంధనాన్ని పొదుపు చేయాలని, విదేశీ మారకద్రవ్య సంరక్షణకు సహకరించాలని గవర్నర్ శివప్రతాప్ శుక్లా పిలుపునిచ్చారు. ప్రధాని నరేంద్ర మోదీ ఇచ్చిన పిలుపు మేరకు ప్రజలు బాధ్యతగా వ్యవహరించాలని కోరారు. ఈ మేరకు గురువారం లోక్ భవన్ ఒక వీడియో సందేశాన్ని విడుదల చేసింది.

ఆదర్శంగా నిలుస్తున్న ప్రధాని
దేశ ప్రయోజనాల కోసం ప్రధాని మోదీ స్వయంగా ఆచరణలో ముందున్నారని గవర్నర్ పేర్కొన్నారు. భద్రతాపరమైన అవసరాలు ఉన్నప్పటికీ, తన కాన్వాయ్‌లోని వాహనాల సంఖ్యను ఆయన తగ్గించుకున్నారని వెల్లడించారు. అంతర్జాతీయంగా నెలకొన్న ఇంధన సంక్షోభం దృష్ట్యా, డాలర్ల వినియోగాన్ని తగ్గిస్తూ రూపాయి విలువను కాపాడాల్సిన బాధ్యత ప్రతి పౌరుడిపై ఉందని గుర్తుచేశారు.

తాను బాధ్యతలు చేపట్టిన నాటి నుంచే వాహనాల వినియోగాన్ని నియంత్రించానని, తాజాగా ప్రధాని పిలుపుతో రాజ్‌భవన్ వాహనాల వినియోగాన్ని మరో 50 శాతం మేర తగ్గించాలని నిర్ణయించుకున్నట్లు గవర్నర్ తెలిపారు.
 * ప్రభుత్వ శాఖల్లోనూ వాహనాల వాడకం తగ్గించేలా చర్యలు తీసుకోవాలని ముఖ్యమంత్రికి సూచించనున్నట్లు పేర్కొన్నారు.
 * రాజకీయ నాయకులు భారీ కాన్వాయ్‌ల సంస్కృతికి స్వస్తి పలకాలని హితవు పలికారు.
 * కేంద్ర మంత్రులు ఆదర్శంగా నిలుస్తున్న తీరును ప్రజాప్రతినిధులు అనుసరించాలని కోరారు.